Durante Accion di Bario na Dakota, Minister di Turismo, Transporte y Labor, mr. Wendrick Cicilia, a reafirma su compromiso cu e continuidad di e iniciativa cu a cuminsa bou di liderazgo di Prome Minister Mike Eman.

 E bishita a reuni varios departamento y servicio publico den bario pa tende e preocupacionnan di residentenan y atende cu e situacionnan cu nan ta enfrenta den nan bida diario.

“Na final di dia, gobernacion ta trata di hende, ta trata di stima hende y ta trata di soluciona e problemanan cu nos hendenan ta enfrenta dia pa dia,” Minister Cicilia a expresa. El a gradici residentenan di Dakota pa e caluroso bonbini cu nan a duna henter e team.

Entre e preocupacionnan cu a sali na cla tabata desperdicio cu ta acumula rond di casnan y awa cu ta keda para. Como parti di e accion, e ekiponan ta haci inspeccion pa identifica luganan unda awa para por bira un criadero di sangura y presenta un riesgo pa salud di residentenan. Segun Minister Cicilia, e presencia di departamentonan den bario ta facilita contacto directo cu residentenan y ta acerca servicionan publico na nan.

Minister Cicilia a gradici Serlimar, Bureau City Inspector, polis di bario y tur otro departamento cu a participa, lidera pa e ekipo di Accion di Bario di Algemene Zaken, cu ta coordina e esfuersonan cada diahuebs.

“Nos ta kere firmemente cu nos mester ta presente den nos barionan pa nos por haci un diferencia pa nos hendenan,” Minister Cicilia a expresa, confirmando cu Accion di Bario lo continua.