Como parti di su mision comercial na Santo Domingo den cuadro di HUB Camara Santo Domingo 2026, Minister di Finansa, Asuntonan Economico y Sector Primario, Geoffrey Wever, a bishita a compania Mercarne pa conoce su capacidad di produccion, standardnan di calidad y experiencia di exportacion, y pa impulsa oportunidadnan comercial concreto cu mercado Arubano.
Mercarne ya ta USDA-approved y ta permiti pa exporta pa Aruba. Esaki ta haci cu e enfokee no ta riba si acceso na mercado ta posibel, sino riba con pa transforma e acceso existente den entreganan comercial real.
“Esaki ta e tipo di resultado cu nos ta busca cu e mision aki. Tin un productor cu ta cumpli cu e standardnan necesario y cu ya tin acceso na mercado Arubano. Awo e enfoke ta riba conecta e productor cu importadornan interesa y crea e condicionnan pa comercio por move,” Minister Wever a indica.
Durante HUB Camara Santo Domingo, Mercarne ya a sostene combersacionnan B2B cu tres compania Arubano. E siguiente fase ta pa e empresanan sigui evalua oferta di producto, volumen, empaketamento, prijs y condicionnan contractual pa determina si tin base pa establece un relacion comercial.
Durante e bishita, Minister Wever a pone atencion special na calidad, seguridad alimentario y continuidad di produccion. Pa producto di carni, e factornan aki ta esencial, hunto cu documentacion correcto, un cadena di refrigeracion y transporte confiabel.
E tamaño relativamente chikito di mercado Arubano ta haci logistica un factor decisivo. Un posibel relacion comercial mester por funciona cu volumen realistico y entrega regular, mientras Mercarne y e empresanan Arubano mester negocia directamente e condicionnan comercial.
“Gobierno no ta negocia prijs ni contrato pa empresarionan. Nos rol ta habri mercado, identifica proveedor confiabel, facilita contacto y yuda kita obstaculonan cu por frena comercio. Despues ta sector priva mester transforma e oportunidad den negoshi,” Minister Wever a enfatisa.
E aspecto logistico ta conecta directamente cu e reunionnan cu Minister Wever a tene durante e mision cu autoridadnan di aviacion y puerto di Republica Dominicana, caminda conectividad, frecuencia, cargo-consolidacion y capacidad refrigera a forma parti di e agenda.
E bishita na Mercarne asina, ta marca un paso mas concreto den e esfuerzo pa diversifica fuentenan di abastecemento di Aruba. En bes di keda na nivel di exploracion general, e mision ta acerca directamente un productor prepara pa exporta cu empresanan Arubano cu tin interes den alternativa nobo.
“Nos ta pasa di oportunidad na ehecucion. Si calidad, prijs, volumen y logistica por alinia, nos por crea un fuente adicional di abastecemento pa Aruba. Esey ta fortalece competencia, resiliencia y seguridad alimentario,” Minister Wever a declara.
Ministerio di Finansa, Asuntonan Economico y Sector Primario lo sigui facilita e contacto entre e actor relevante y duna seguimiento na e oportunidadnan comercial cu ta sali for di HUB Camara Santo Domingo 2026.
