Disciplina ta inclui den nos educacion, un educacion sin displina, ta un educacion sin direccion.
Mester splica un mucha for di chikito kico por, y kico no por.
Tur cos tin su tempo, tur cos mester wordo guia, no por laga e mucha pa su cuenta.
Segun e ta bira grandi nos mester mustre regla di bida.
No laga e asunto den man di creche, speelschool,etc, pero e fundeshi di educacion ta bini di cas.
Pasobra educacion ta amor, ta cuido,ta bondad, ta un deseo pa bienestar y un bon crecemento.
Una bes no tin disciplina, y no tin coreccion, malcriansa ta drenta, cu tur su consecuencia.
Dios ta disciplina esnan cu e ta stima, pa asina nan por ta disponibel den Su obra.
Awor si Dios ta disciplina nos, nos tambe mester disciplina,nos yuinan, pa nan cana den caminda di Dios.
E motibo pa cual nos mester disciplina y guia nos yiu, ta pa motibo cu sin guia y disciplina e mucha ta manera un barco sin capitan.
Ora nos ta papia di disciplina, nos no ta papia di bati, of suta, esey por bini caminda disciplina faya, pero e disciplina berdadero ta e manera cu nos ta lanta nos yiu, cu palabra cu ta edifica tur dia.
Ta dificil pa disciplina cu amargura, mester pone ayera un banda, pa haci tur cos di nobo awe, si un mucha a haci cos robes ayera, awe ta un dia nobo, y nos ta pone ayera un banda, y nos no ta sigi ripiti,
e mesun cos, no esey no ta bon, nos ta pordona y lubida, pasobra esey tambe ta e disciplina cu Dios ta duna nos.
Disiplina cu palabra malo, no ta disciplina, si den pasado, muchanan tabata wordo disciplina cu sota y palabra malo, esey no tin mester di continua awendia, pasobra e palabra di Dios, ta bisa, pa nos lanta nos yuinan den disciplina y instruccion ( Palabra ) di Senjor.
Pero tambe disciplina no ta negociabel, tur cas mester tin regla. Pasobra nos Dios ta un Dios di orden, y respet, pesey mos tambe mester tin orden y respet den nos cas.
Esey no ta wordo demostra cu forsa y palabra malo y cu violencia, pero e ta wordo mustra cu e forma di bida cu e mayor ta hiba, pa asina e muchanan por copia locual cu ta bon, y asina aplike den nan bida.
Si un mayor ta duna bon testimonio, cu bon manera, y cu decensia, e tin menos dolor di cabes cu su yiunan, pasobra e por bisa nan y mustra nan cu wak kico e ta haci y con e ta comporta su mes, y asina e por guianan cu hecho y palabra den bon caminda.
No haci nada contra ley, y no permiti nada contra ley wordo haci den bo cas, no habri porta pa diabel,no provoca, ni intimida, tampoco manipula, pasobra tur esey ta cos di reino di scuridad.
Mas amor, mas bondad, mas fieldad, mas liher e crecemento ta bini, y mas liher e famia lo ta uni, pasobra disciplina den Senjor ta yena cas cu amor.
Laga tur gritamento, furia, y rabia un banda,como mayor papia cu otro, yega na acuerdo entre boso dos con boso ta bay dirigi boso yuinan, no bay para discuti nan dilanti, ken ta gana mas,ken tin mas forsa, of discucion tocante infieldad, pasobra tur esey ta herida curason di yiunan.
Awor den e tempo cu nos ta bibando aki, union entre mayor ta primordial, pa disciplina y guia nan yiunan.
E amor di Dios, tey pa nos.
Sinceramente, Pastor Marcel Balootje.
