Minister di Salubridad, Asunto Social, Cuido di Adulto Mayor y Maneho di Adiccion, sra. drs. Melvin Wyatt-Ras, a tuma paso pa enfrenta e problematica di adictonan ambulante cu ta biba riba caya y cu hopi biaha ta cay afo di sistema di cuido.
Como parti di esaki, e Minister a ricibi un plan, presenta door di Bureau Ondersteuning Verslavingszorg (BOV), representa door di Sr. Jerehm Campbell, pa implementacion di un facilidad pa cuido y intervencion di personanan cu adiccion y problema mental severo.
Ademas, BOV a presenta e plan den Conseho di Minister.
E plan, desaroya den colaboracion entre e Ministerio di Salubridad, Ministerio di Husticia y BOV, ta enfoca riba fortalecemento di cuido y intervencion ora ta necesario, den un ambiente controla y sigur.
Paralelo cu esaki, e Minister a indica cu tin intencion pa habri un daklozenopvang cu lo ta habri 24/7, unda adictonan ambulante por acudi pa ricibi no solamente ayudo humanitario, pero tambe intervencion y guia.
E iniciativa aki ta un paso importante den e trabou pa atende e problematica di adiccion den nos comunidad.
Segun Minister Wyatt-Ras, e iniciativa aki ta necesario:
“Nos no por sigui mira otro banda ora tin personanan cu ta cay afo di sistema pa motibo di adiccion. Como gobierno, nos ta tuma accion concreto pa brinda cuido y intervencion ora ta necesario. Nos meta ta pa contribui na restaura dignidad humano y crea oportunidad pa rehabilitacion y reintegracion den sociedad.”
Bou liderazgo di Minister Wyatt-Ras, e Ministerio di Salubridad, Asunto Social, Cuido di Adulto Mayor y Maneho di Adiccion lo sigui cu e implementacion di e plan, den colaboracion cu su partnernan, como parti di su responsabilidad pa guia y fortalece cuido di adiccion na Aruba.
