Durante Homenahe na Jossy Brokke Jr. pa su 65 aña carera artistico
Un Premio di ‘Fundacion Go Cultura’ cu lo wordo entrega na un artista tur aña
ORANJESTAD – Diaranson Fundacion Go Cultura a organisa un bunita anochi cultural brindando tributo musical na un tremendo artista y baluarte, sr. Jossy Adriaan Brokke Jr. den Cas di Cultura.
Minister di Cultura Xiomara Maduro tabata presente pa experencia e bunita homenahe aki y a dirigi palabra na tur presente.
Minister Xiomara Maduro a expresa cu ‘Fundacion Go Cultura’ a reconoce nos cultura y nos yiunan di tera, manera Jossy mes ta canta den e cancion ‘Pais’. E mandatario a conta un poco di Jossy como persona y su carera artistico.
Jossy su carera musical a cuminsa ora e tabatin apenas 9 aña. Su prome presentacion tabata cu e cantica ‘ La cama de piedra’ den e popular programa ‘Buscando talento artistico’ di Addison Croes, den feliz memoria. Den añanan 60 y 70, Jossy a representa nos pais na masha hopi festival internacional y a sali ganador absoluto den mayoria.
Ora cu Jossy a gana e ‘Festival Voz di Oro’, Ruben Garcia a dune a apodo di ‘ E Voz di Oro’ di Aruba. Jossy a participa entre otro na e ‘Festival di Papiamento’ cu su prome composicion original cu e so a compone, cu e cancion ‘ Maria, mi mama’, na final di decada 60 cual tambe ela sali e ganador absoluto.
Jossy a forma parti di e grupo ‘Los Casinos’ y ‘Los Caciques’. Na aña 1967 Jossy a haci su prome grabacion cu a tuma luga na TeleAruba. Despues ela graba su prome disco 45, cu a wordo financia pa su amigo Sr. Camilo Alejandro Muyale y a logra bende un cantidad di 5 mil disco, cu tabata hopi pa e tempo ey. Jossy tabata graba cu e grupo ‘The strangers’ y su disconan tabata popular tanto na Aruba, Corsou y Boneiro.
Su prome LP ela graba na aña 1980 na Volendam na Hulanda. Na aña 1996, ela graba un disco compacto ‘Cancionnan di mi bida’, cu a refleha e trayectoria di su carera artistico. Na aña 2009, Jossy a produci un dobbel CD cu cancionnan sumamente bunita. Durante Jossy su celebracion di 50 aña den farandula, ela produci un otro disco compacto cu 14 cancion.
Jossy a participa tambe na hopi festival internacionalmente, e ‘Festival Internacional de la Cancion’, cu a tuma luga na Acapulco, Mexico y tambe a representa nos Pais na varios otro festival internacional manera na Puerto Rico, Venezuela, Colombia, Nicaragua y Costa Rica. Jossy ta un tremendo embahador di nos Pais Aruba. Jossy tabata e cantante invita na ceremonianan cerca Gobernador pa presenta dilanti Su Mahestad La Reina Juliana y su yiunan na Aruba y Corsou.
Den decada 80 e pareha a biba na Hulanda y Alemania y durante e temporada aki Jossy a fungi como embahador musical y cultural di nos Pais, cantando na varios Pais y promoviendo nos Pais. Tambe ela participa na varios beurs grandi di Turismo na Europa. Na principio di decada 90,
Jossy hunto cu su casa Sandra a regresa Aruba y durante di e temporada aki Jossy tabata conoci pa su ‘Talkshow Nos cu Nos’ y su programa musical ‘Jossy ta presenta’.
Jossy ta un artista completo, cantante, compositor, productor, presentado di television, organisado y productor di hopi evento y empresario creativo. Jossy a duna hopi otro artista oportunidad y tarima pa asina nan por a expone nan talento.
Minister Xiomara Maduro a trece dilanti cu Jossy a composita tambe varios cancion na Papiamento, Spaño y na Ingles. Un di e hopi composicion cu a bira hopi popular ta e cancion ‘Pais’, un cancion cu e mandatario mes ta gusta masha hopi mes. Durante e Conferencia 35 aña Status Aparte – Aruba Ta Di Nos Tur, cu Gobierno di Aruba a organisa siman pasa, a pone ‘gemoed’ di hopi hende yena y lagrimanan di wowo a cay, ora cu na final di e Conferencia aki, Edjean y Jossy a presenta como sorpresa, acompaña pa e musico Kris Kross. Un cancion cu ta toca curason di tur cu a presencia of sigui e Conferencia aki.
E mandatario a sigui bisa cu ‘Pais Aruba ta rico na cultura y arte. Cultura bo tin cu bib’e. Nos mester ta orguyoso di nos Pais Aruba, di nos cultura y di nos hendenan. Pa e motibo aki Gobierno di Aruba ta sostene e iniciativa y ta gradici Fundacion Go Cultura’ pa organisa e homenahe ‘T’ami ta Jossy, na ocasion di celebracion di su 65 aña carera artistico’. Minister di Cultura Xiomara Maduro den nomber di Gobierno di Aruba a gradici Jossy Brokke Jr. pa tur e aporte cu ela duna na cultura di nos Pais Aruba. E dignatario a continua bisando ‘Danki na su forsa creativo y habilidad di compone composicionnan den nos idioma cu ta toca nos profundamente. Un danki special pa yuda nos sostene, comparti, promove y balora nos cultura. Nos ta aprecia ora un yiu di tera cu a entrega tur su amor, alma y curason pa inspira, motiva nos hendenan y uni nos pueblo.’
Tabata un honor pa Minister di Cultura, den nomber di Fundacion Go Cultura, den aliansa cu Gobierno di Aruba y den nomber di henter pueblo di Aruba cu ta stima Jossy, pa entrega Jossy Brokke Jr. e prome ‘Premio Crioyo di Oro’, un Premio di Fundacion Go Cultura cu lo wordo entrega na un artista tur aña.
E Premio aki ta como merito na Jossy pa su excelencia, pa su calidad humano y pa su entrega di 65 aña cantando pa nos pueblo y hibando nos cultura internacionalmente. ‘Un premio merecedor di ta den man di e crioyo Arubano, cu tin e voz y e curason di oro cu ta bati pa su Pais. Masha Pabien na ‘E Voz di Oro’ di Aruba!’ asina Minister di Cultura Xiomara Maduro a termina su discurso prome cu e entrega Jossy Brokke Jr., e prome ‘Premio Crioyo di Oro’.
