Diabierna ultimo Parlamento di Aruba tawata invita pa un firmamento di un MOU entre Gobierno di Aruba y United Farmers Aruba (UFA). Na Cunucu Chabelito situa na Santa Rosa a tuma lugar e firmamento aki mirando cu e lugar ta mustra simbolicamente e meta di e MOU. Den presencia di Minister Arends y Minister Wever hunto cu sr. Fung-A-Fat den nomber di miembronan di UFA y diferente invitado presente a firma un MUO como base di cooperacion y estimulo entre Gobierno y partnernan clave den comunidad di sector priva cu ta traha den e sector di agricultura na Aruba.  

Prome cu e Pandemia di Coronavirus caba Aruba manera gran parti di e paisnan na mundo ta trahando na e diferente metanan di Desaroyo Sostenibel (SDGs), e asina yama agenda 2030. Un di e metanan principal cu ta forma parti di meta number 12 di SDGs cu ta Consumo y Produccion responsabel, ta e seguridad di alimentacion di cada pais. Motibo ta cu si poblacion na mundo keda crece na e nivel cu ta creciendo, den futuro ta premira cu cuminda ta bay bira mas schaars. Pesey un di e metanan stipula pa Nacionnan Uni cu e señala esaki, ta pa di awor caba stimula paisnan pone mas enfasis na produci mas y tambe produci mas alimentacion propio na cada pais.

Durante e mainta aki por a tuma nota cu Minister Arends a menciona cu parti di su vision pa cu sector primario ta su compromiso pa aumenta e seguridad di alimentacion pa 2025 na 15% y pa 2030 na 20%. Cu e MOU aki e ta spera un desroyo positivo pa pais Aruba mirando cu cooperacion entre Gobierno y partnernan clave ta ser stimula cu un termino di 3 aña. Mas Aruba logra produci su mesun productonan, entre otro productonan di alimentacion, por lo menos un poco menos dependiente Aruba por bira di desaroyonan internacionl cu e bista cu gran parti di productonan na Aruba ta wordo importa.

Palabra di pabien ta bay na Minster Arends y Minister Wever y Gobierno di Aruba den su totalidad pero tambe na UFA y Santa Rosa pa firma e acuerdo di colaboracion aki. UFA ta spera di colabora tambe cu data pa asina Gobierno por tuma decisionnan cu base di informacion den e sector agricultural. Parlamentario Setty Christiaans-Yarzagaray ta spera cu e colaboracion aki por contribui tambe no solamente na mas stimulacion den e plantamento na Aruba pero tambe criamento di bestia. Mirando cu esaki tambe ta un parti grani di importacion cu por ser transforma den produccion local.

LEAVE A REPLY

Please enter your comment!
Please enter your name here