Dios Tata ta bisa den Bijbel, Levitico 19: 28: “No haci cortanan riba boso curpa pa e mortonan y no marca boso curpa cu tatuahenan.” Compronde bon, cu tatuahenan riba curpa ta un marca e ta y un marca ta significa, bo ta di mi, bo ta di e mundo aki etc. Por ehempel un wardador tin, carnenan, cabritonan, bacanan etc., y e wardador ta marca su animalnan pa mustra cu e animalnan ta di dje. Tatuahenan riba curpa tin diferente simbolonan di un persona difunto, di recuerdo y promesanan haci y esey ta habri e caminda pa e mal spiritonan drenta den bo bida. Den Bijbel Deuteronomio 14: 1-2, Dios Tata ta bisa: “Dios di bosonan tin boso pa Su yiunan. No marca boso curpa y ni corta boso cabey pelon pa un morto.” Compronde bon, cu tur sorto di tatuahenan riba curpa, ta ofendiendo Dios Spirito Santo cu ta biba den boso. Bosonan no sa, cu boso curpa tin e seyo di Dios Spirito Santo, pa medio di bautismo y bosonan a wordo ungi cu e azeta bendiciona Crisma, cu bosonan ta pertenece na Dios Tata. Den Bijbel 1 Corinthionan 6: 19-20, San Pablo ta bisa: “Boso no sabi cu boso curpa ta tempel di Spirito Santo? Dios a duna boso Spirito Santo y E Spirito Santo ta biba den boso. Boso no ta di boso mes. Dios a cumpra boso y e prijs ta paga. Usa boso curpa anto pa glorifica Dios.” Boso no sabi, cu curpa y alma ta igual? Boso curpa cu tin tatuahenan na ora di morto, e alma ta sali tambe cu e marcanan di e tatuahenan. Compronde bon, e almanan cu e tatuahenan no por drenta den e Reino di Dios, pasobra den Bijbel Levitico 19: 28 y den Deuteronomio 14: 1-12, Dios Tata ta bisa bon cla, no marca boso curpa cu tatuahenan. Den Bijbel Mateo 5: 18, Cristo-Hesus ta bisa bon cla: “Mi ta sigura boso: Prome cu cielo y tera pasa bay, cu ningun gota y ningun puntacion di Ley lo no bay perdi, prome cu tur cos a sosode.” Hesus ta bisa bon cla, cu Su palabranan lo wordo cumpli y nada no ta wordo kita. Bijbel 1 Corinthionan 3: 15: “Si un hende su obra a kima y a bira shinishi, e persona mes tin cu paga. E lo salba, pero pasando pa medio di candela.” Den e Palabra di Dios aki, si un hende cu a cuminsa cu su bida Cristian haciendo obranan pa Dios, pero na ultimo momento el a desvia den picanan vinial, den bida imperfecto y sin obra pa Dios of el a marca su curpa cu tatuahenan etc. Anto tur su trabaonan Cristian y e obranan pa Dios a caba na nada. Prome cu morto e persona a ricibi Sacramento di Santa Oleo y a confesa su pikanan. Na ora di morto lo e ta salba, pero su alma lo bay den purgatorio, na unda e alma ta wordo purifica di tur impuresa y pa kita e tatuahenan, pa e alma por drenta den e Reino di Dios. Den Bijbel Revelacion 21: 27: “Ningun hende impuro no por drenta den Reino di Dios.” Purgatorio ta wordo comprendi, un lugar na unda e almanan cu a muri den gracia di Dios, pero nan no a muri totalmente purifica, pesey e almanan aki tin di bay den un proceso di purificacion prome cu drenta den e Gloria di Dios. Esaki no ta un lugar di castigo eterno, pero e ta un purificacion temporario, pa paga debenan di e picanan vinial y pa esnan imperfecto y pa e marcanan di tatuahe wordo kita etc. Pa esnan cu tin tatuahenan cu simbolonan satanico, pentagram satanico, e marca di anti-cristo 666, simbolonan di dragon, di devil horn, black panter, di carpachi etc. Tur e tatuahenan satanico aki, nan mester wordo kita mas pronto posibel, pasobra na ora di morto e alma lo bay den fierno di biaha, lesa Bijbel Apocalipsis 14: 9-11; “Ken cu adora e bestia y su imagen y laga pone e marca riba su frenta of su man, esun ey lo bebe di e binja di Dios Su rabia, cu ta prepara puro den copa di Su ira y lo e keda tormente cu candela y zwavel dilanti di Angelnan, Santonan y di E Lamchi.” Esaki ta esnan cu tin marcanan y tatuahenan satanico riba nan curpa. Awor bo por mira, cu ningun hende cu marcanan of tatuahenan riba curpa, nan no por ta dilanti di e Trono di Dios Tata. Pasobra den e Reino di Dios Tata no tin nngun hende impuro.
Un Mensahero di Dios.
Seferino Tromp
