Corigiendo esnan cu no ta compronde
Nan ta dos institucion diferente cu autoridad diferente
Den ultimo dianan, por lesa cierto medionan cu ta haci e remarke entre Algemene Rekenkamer cu Hospital relaciona cu e directornan. Aparentemente tin medionan cu no ta compronde e status legal di e institucionnan aki y nan respectivo autoridad.
Algemene Rekenkamer ta un Hoog College Van Staat, esta un colegio di Estado, cu ta controla y conseha Gobierno cu ta wordo nombra dor di Gobierno.
Alegemene Rekenkamer, desde 1 di juli 2020, a instala su propio codigo di etica di comportacion, esta gedragscode, unda ta determina con su miembronan mester funcciona, comporta o sea mester ta intergro den tur sentido.
Loke a sosode cu un miembro di Algemene Rekenkamer na October 2021, ta completamente diferente di loke a sosode cu un director di Hospital.
Tabata dia 16 di October 2021, cu e vice presidente di ARA, a haye den un incidente di buracheria na Burgerking, unda cu precensia di polis a wordo solicita, pa un homber super super fastioso cu a lanta cu e personal di e restaurant y despues no kier a paga su cuenta. Polis a purba na tene e situacion nechi, a papia cun’e, pero a bin constata cu e homber no por ni para riba su pianan, pa cual a detene.
Loke a pasa cu un director di Hospital, no tin nada di haber cu haci fastioso, ni tampoco a pidi precencia di polis. Tabata riba un control policial y cu a controla pa alcohol, unda el’a surpasa un poco e limite. Ningun momento e director encuestion a haci cualke acto di escandalo, causa problema, etc.
Pues, e medionan di comunicacion cu ta lansa e pregunta riba e dos casonan aki, ta totalmente equiboca, pasobra pa di prome, Algemene Rekenkamer ta cay directamente bao di Gobierno, y tin su protocol di comportacion estableci desde 1 di juli 2020. Sr. Nuboer a viola tur esakinan.
Contrario cu na Hospital, e autoridad no ta ni di parlamento ni di minister, sino di un raad van bestuur, pues, e poder ta separa.
Cu e director den su bida priva, a surpasa e limite estableci, sigur ta un delito pa cu ley di trafico, den su horario personal, pero no tin un acto di tal gravedad cometi manera Nuboer, cu a viola codigo di etica di ARA, haci escandalo na e restaurant, keda sin paga su cuenta, y pa colmo no tabata por a para riba su pia.
Ta notabel cu cierto medionan no por haci e comparacion adecuado aki y kier keda pusha pa duna e director financiero di hospital e mes un culpa cu vice presidente di ARA y ta pidi pa kite di trabao of ta insinua cu e caso a bay den lachi.
Nos no tin duda cu Hospital tambe lo tuma su accion necesario pa atende cu e persona, cu entretanto a pidi su disculpa.
