E guera na Ucraina ta sigui mientras ta bisto cu na Ucraina, e sosten di paisnan di Nato no a yuda mucha y Ucraina ta sufriendo un derota mahos y no tin nada pa cambia esaki.
E conferencia di Zelensky na Luzern Suisa.
Algun siman pasa tabatin un conferencia di Paz ariba Ucraina. E tabata wordo yama e ‘Zelensky’s peace conference’.
No tabatin nada memorable na e conferencia aki y ni a produci algo drechi. Durante e conferencia un declaracion por a ser firma, pero hopi paisnan participante no a firma e declaracion aki. Tambe tin cu a firmele, despues a pidi pa elimina nan firma. E paisnan di Nato y nan aliadonan hopi pega a firma e declaracion aki.
E otro partido den e guera, Rusia, no a ser invita mes, pues e conferencia no por ser cualifica como un conferencia pa busca paz pa e guera na Ucraina. Conoci tambe ta cu e paisnan fuerte na Mundo manera China India y Merca no a manda nan presidente na e conferencia aki. Sigur e ausencia di Biden, e aliado mas fuerte di Ucraina ta bisa hopi.
E temanan mas importante durante e conferencia tabata desicionnan pa Ucraina ricibi mas ayudo militar y financiero, tambe un banquete luho durante e conferencia.
Den corto historia di algun conflictonan Arma y e solucionnan despues di 1945.
Despues di e II Guera Mundial e nomber di guera a ser cambia den “conflicto arma”. Tambe ta un hecho cu despues di II Guera Mundial a nace un polis global cual ta NU (Nacionnan Uni) y via resolucionnan di CSNU ta pone e partidonan na mesa di negociacion y busca un solucion.
Hopi acuerdonan di Paz a ser logra despues di procesonan di paz, manera ta e casonan na Korea, Cyprus, Kashmir, na Africa, na Balkan na Europa y tambe problemanan entre republicanan di Ex-Union Sovietico
Maske tin casonan cu no a yega na solucion manera e caso di Palestina. Israel tin mayoria di teritorio di Palestina ocupa for di 1948, cual ta contra desicion di NU, tampoco Israel no kier sali di e teritorionan di Palestina. Aserca ningun pais por a saca Israel for di e teritorionan di Palestina, cu Israel semper violando derechonan humano. Conoci di algun siman atras ta e resolucion aproba den CSNU pa un tregua na Gaza, un resolucion cu Merca ta bisa cu ta di Israel, pero cu Israel mes no ta respeta y ta sigui bombardea Gaza. E postura di Israel cu ayudo di Merca ta e motibo principal di mayoria di e gueranan na Medio-Oriente.
E era di 1992 pa 2022, Merca/Nato e poder unipolar na mundo, hopi gueranan immoral. Tambe tin e caso di e guera di Vietnam, unda Merca cu a inicia e guera, despues cu Francia, ex colonizador di Vietnam a sali di Vietnam y Merca a drenta, segun nan declaracion pa preveni cu comunistanan ta coy poder na Sur-Vietnam. Despues di perdidanan grandi, demonstracionnan na mundo henter y agitacionnan grandi contra Merca, por bisa Merca a perde e guera. Merca a bandona e guera y laga su aliado (Sur-Vietnam) sigui cu un guera perdi, contra di esnan cu tabata ganando e guera, Nort-Vietnam. Finalmente Sur-Vietnam a perde e guera. Nort- y Sur-Vietnam a stop di existi y nos tin UN VIETNAM.
Despues cu Union Sovietica a stop di existi na final di 1991, nos a drenta na 1992, e era Unipolar, unda Merca/Nato tabatin tur poder. Durante e periodo aki, a kita e poder di UNO y Merca/Nato tabata e unico polis mundial. Merca/Nato semper tabatin rason y tur otro instancianan tabata fout y nos a conoce e gueranan immoral na Yugoslavia, na Afghanistan, na Libya, na Irak, na Syria, na Sudan, na Somalia, na Jemen. Por bisa tambe cu e guera na Ucraina, cual a cuminsa na 2014 te cu final di 2021 tabata e caso, pa loke ta e postura di rasonamento di Merca/Nato. Na 2022 a inicia e era Multipolar unda cu banda di Merca/Nato, Rusia y China a surgi como podernan na Mundo. E guera na Ucraina a inicia den un era Unipolar na 2014 y awor nos ta den un mundo Multipolar.
Acontecimentonan na Ucraina prome cu 2014, na inicio di e guera y despues.
Despues di eliminacion di Union Sovietica y e Pacto di Warshaw na 1991, Merca/Nato acuminsa cu e asina yama revolucionnan di color na Europa oriental Na 2006 Janucovich ta gana e eleccion Parlamentario y despues na 2010 Janucovich a gana eleccion pa presidente di Ucraina, cu apoyo grandi di poblacionnan Ruso-parlante. Na fin di 2013, gobierno di Janucovich a scoge pa un mihor deal financiero/economico cu Rusia compara cu e acuerdo di asosacion cu UE. Demonstracionnan masal cu violencia extremo durante e Revolucion Maidan tabata motibo pa Presidente Janucovich bay Kharkov, e di 2 ciudad di Ucraina, na inicio di 2014. E revolucion Maiden, segun e secretario di Merca pa asuntonan di Europa Oriental, sra Victoria Nuland, Merca a hinca 5 biyon dollar (VIA CIA) den e revolucion. Despues violencia y menasanan contra parlamentarionan cu tabata apoya Janucovich, a haci cu un gran cantidad di parlamentarionan cu tabata apoya Janucovich a bandona nan puesto. For di e poco parlamentrionan cu a keda, nan a forma un quorum y parlamento a pasa yen di leynan contra e gobierno di Janucovich, cualnan, for di Kharkiv, Janucovich a rechasa.
Un acuerdo di Janucovich cu e lidernan di oposicion den parlamento, pa forma un gobierno di unidad, cu algun reformanan pa reduci e poder di e presidente Janucovich y pa elecion tuma lugar mas tempran. Paisnan Europeo a firma e acuerdo, Merca no, pero si Merca a haci un declaracion cu ta apoya pa Janucovich keda como presidente.
E demonstrantenan no a bay di acuerdo y UE, ni Merca no a convence nan pa respeta e acuerdo. Janucovich a hui bay Rusia, defacto e golpi di estado a ser concretisa, reconoci pa Merca y UE.
Despues di e golpi di Estado pa baha Janucovich, desaster na Ucraina
E gobierno nobo a pasa yen di di leynan contra esnan cu ta papia ruso y despues a cuminsa un guera total contra Ruso-Parlantenan, na Donbas, cual ta consisti di e provincianan Luhansk y Donetsk. Habitantenan di Luhansk y Donetsk a rebeldia y nan a forma nan gruponan arma y a cuminsa un guera contra e gobierno di Ucraina, sigur cu apoyo di Rusia.
Total a muri na Donbas como 14 mil Ruso-parlante, mayoria Muhernan y Muchanan.
Na augustus 2014, despues cu Ucraina a sufri un derota, a firma e acuerdo di Minsk I, 5 sept 2014. E acuerdo no a stop e guera y despues cu na januari 2015 Ucraina a sufri otro derota grandi y dia 12 februari 2015 a firma Minsk II. E acuerdonan ta ensera mas autonomia pa e Ruso-parlantenan na Donbas. E paisnan cualnan lo para garante pa e acuerdonan wordo cumpli, tabata gobiernonan di Alemania, di Francia, di Ucraina y lidernan di e republicanan proclama di Donetsk y Luhansk. Tambe e acuerdonan a ricibi aprobacion di CSNU.
Despues na 2022/2023 e presidentenan di Alemania, di Francia y di Ucraina, kendenan a firma e acuerdonan di Minsk, tur a declara cu nan a firma e acuerdonan pa duna Ucraina mas tempo pa por prepara su mes militarmente.
Rusia dia 17 dec 2021 a manda un carta na e paisnan di Nato pa sinta na mesa, pa papia ariba e posicion di seguridad pa Rusia y tambe pa respeta e acuerdonan di Minsk. Rusia a ser ignora totalmente y ta invadi Ucraina na febr 2022.
Na april 2022 Rusia y Ucraina a yega na un acuerdo. Den corto esaki ta ensera cu Ucraina nunca lo bira miembro di Nato y ta bay pone e acuerdonan di Minsk den ehecucion. Boris Johnson cu aprobacion di Biden a biaha bay Kiev y ordena Zelensky pa no firma ningun acuerdo cu Rusia y continua cu e guera. Ucraina lo ricibi tur apoyo militar di Nato.
E conferencia di Zelensky na Suisa a fracasa
E conferencia di Zelensky na Suisa no por a duna resultado. Hasta e idea original pa un resolucion a base di e formula di Paz di Zelensky esta e capitulacion di Rusia no tabata ariba e agenda. Mayoria di discursonan di lidernan politico specialmente for di Europa, tabata pa continua ariba trahamento di un formula pa crea un proceso di paz.
Tabata di comprende tambe pasobra na mayoria di paisnan unda algun siman prome, e partidonan di gobiernonan cualnan a duna apoyo grandi na Ucraina, a perde den e eleccion pa parlamento Europeo. Pues tabata dificil pa nan fiha un posicion. Maske mester bisa cu e parlamento Europeo ta e unico parlamento na mundo cu no por traha ley. Ta e comision Europeo ta percura pa e leynan y mayoria di desicionnan.
Zelensky ta prepara un otro plan pa termina e guera.
Durante un conferencia cu e presidente di Slovenia diabierna 28 juni, Zelensky ta anuncia un otro plan pa termina e guera.
E lo trece e plan pa su partnernan y a bisa ta bon pa mayoria di mundo accepta su plan via canalnan diplomatico. Su plan bieuw di november 2022 a ser rechasa redondamente pa Rusia. Zelensky a bisa cu e no kier pa e guera sigui, pero Ucraina mester ta fuerte ariba e campo di bataya, su plan ta cla prome cu fin di 2024. Su plan di paz lo ser negocia via canalnan diplomatico, hunto cu su amigonan. E declaracionnan aki Zelensky a haci despues cu un dia prome e a firma un pacto di seguridad cu UE, mesun pacto cu e a firma cu Merca pa Ucraina sigui ricibi ayudo financiero y militar a largo plaso. Esaki, enbista si Trump gana e eleccion presidencial na Merca.
E guera ta sigui, pero yegando su fin.
No tin speransa pa Ucraina saca un mihor posicion. Mas e guera dura, mas debil su posicion ta bira y ta wordo bisa cu hasta Ucraina por desparce.
Na final di 2022 Rusia a analisa su situacion militar, tabatin un falta grandi di militar, nan a trece leynan pa engrandece e ehercito Ruso. Na final di 2023, como cuatercienmil solda , bon entrena durante 7 luna, cu e armanan moderno, cu tankinan di guera nobo y otro armanan sofestica, a drenta den bataya. Esaki a duna resultado cu e aña aki tur bataya ta ser gana rapidamente y Rusia ta avansando. Rusia un biaha mas e aña aki, ta cla pa hinca algun cienmil solda nobo den e lucha na Ucraina. Di otro banda tin Ucraina cu falta di militar, falta di arma y equiponan militar. Hopi comentaristanan for di campo di Bataya, kendenan ta wak e realidad, ta di opinion cu nos ta na bispo di un colapso di e ehercito di Ucraina.
Si nos tuma na consideracion e derotanan politico den eleccionnan na Alemania, na Francia, na otro paisnan di e amigonan di Zekensky y e derotanan cu ta biniendo na Inglatera y Merca,
segun e comentaristanan, tempo ta cabando pa Ucraina, No ta keda nada otro pa negocia cu Rusia a base di e proposicionnan di Rusia.
Na 2014, Ucraina a perde Crimea. Segun e acuerdonan di Minski y esun di Istanboel, Donetsk y Luhansk ta ricibi mas autonomia, pero ta keda parti di Ucraina, pero rechasa pa Ucraina y e guera ta sigui. Na sept 2022, Donetsk, Luhansk, Zaporizhshia y Kherson, 4 provincianan ta vota pa bira parti di Rusia. Si e guera sigui, Kharkif y Odessa tambe cu poblacionnan Ruso-parlante, por scoge pa bira parti di Rusia.
Pa Ucraina e apoyo di Nato no a, ni lo duna ningun resultado, mas liher nan yega na un acuerdo cu Rusia pa para e guera, mas mihor pa nan, pa nan no perde mas teritorio.
Gregorio Wolff
