Hotdog pa 2 dollar, nacho pa 3 dollar, of cerbes pa 5 dollar t’e priisnan “low-cost” cu e fanaticonan Spaño lo haya den e Mercedes-Benz Stadium ora cu e seleccion di Spaña debuta den e Mundial. Esaki ta parti di un strategia di negoshi di Arthur Blank, kende su compania ta opera e stadion, pa honra e bishitantenan.
Blank, doño di e ekipo Atlanta Falcons (NFL) y Atlanta United (MLS), tin e derechonan di explotacion di e luga pa medio di su compania AMB Sports and Entertainment. Durante e Mundial, e luga aki lo ta conoci como Atlanta Stadium y lo t’e sede caminda Spaña lo hunga su prome dos partidonan.
E co-fundado di Home Depot a indica den un entrevista cu lo mantene prijsnan rasonabel pa cuminda y bebida durante e evento, loke ta hopi mas abou compara cu otro stadionnan na Merca. Mientras cu na luganan manera MetLife Stadium na New York of SoFi Stadium na Los Angeles un hotdog por costa entre 8 pa 10 dollar, na Atlanta e priisnan lo ta entre 70% pa 80% mas abou.
Atlanta ta duna bonbini na Spaña E stadion na Atlanta tin capacidad pa mas di 75,000 asiento y lo ta sede pa ocho partido di Mundial, incluyendo un semifinal. Entre e partidonan aki tin e debut di Spaña contra Cabo Verde dia 15 di juni, y e siguiente encuentro contra Saudi Arabia dia 21 di juni.
E luga aki, inaugura na 2017 despues di un inversion di 1,600 miyon dollar, ta destaca pa su dak cu por habri y sera den menos di dies minuut y un enorme pantaya LED rond di e parti superior.
Logistica t facilidad pa bishitante Segun Josh Blank, vice-presidente di e compania, Atlanta tin rond di 20,000 camber di hotel na un distancia cu por cana bay e stadion. Ademas, e Aeropuerto Internacional di Atlanta ta esun mas ocupa na mundo i ta keda na menos di binti minuut di e centro di e ciudad.
Curiosamente, e stadion aki lo ta e unico cu lo mantene su publicidad comercial riba e dak. Tapando e logo grandi di Mercedes-Benz lo ta un desafio logistico demasiado grandi, p’esey FIFA a haci un excepcion pa evita daño na e structura.
Priis di entrada ta keda halto
E parti menos positivo pa e fanaticonan ta e costo di e entradaan. E ticket mas barata pa mira e debut di Spaña ta costa 601 dollar, mientras cu pa e partido contra Saudi Arabia e priis minimo ta 666 dollar. Maske e cifranan aki ta halto, nan ta keda abou si compara nan cu e 1,000 dollar pa mira e debut di Merca na Los Angeles, of e 9,000 dollar cu e entrada mas barata pa e final na New York ta costa.
