Mescos cu un tata ta contento ora su yiu ta obedece, asina tambe Dios ta contento cu nos ora nos ta biba den obediencia, pasobra obediencia ta agrada Dios.
Hopi ta lubida cu e bendicionnan aki ta por conta pa tur hende cu ta den obediencia na Senjor;
Awor lo sosode cu si boso obedece cu tur diligensia Senjor bo Dios, y percura pa cumpli cu tur su mandamentonan cu mi ta ordena awe,Senjor bo Dios lo halsa bo riba e tur e nacionnan di mundo, Y tur e bendicionanan aki, lo bin riba bo y lo alcansa bo, si bo obedece Senjor bo Dios.( Deuteronomio 28:1-6).
Obediencia na Dios, ta nifica confiansa den Dios , ta nifica respet pa Su palabra,ta nifica dependencia di Dios.
Ta masha facil pa nos por ripara con hende ta biba den desobedencia na Dios, anja aden y anja afo, y a haci desobedencia como parti di bida, un custumber of casi manera un cultura, e a bira asina normal cu casi hende su consenshi no ta morde mas, pasobra sabiendo bon kico nan ta haci nan ta continua toch.
Esun cu ta stima Dios ta obedece Su palabra, caminda no tin amor, no tin obedencia, pasobra ningun hende no por ganja Dios, no ta existi obediencia parcial, of mitar obediencia, pasobra tarda pa obedece tambe ta desobediencia.
Un hende por tin tur conocemento, pero si e no ta obedece Dios, tur su conocemento no por yude.
Ta nos obediencia ta dicidi na unda nos ta bay despues di morto, sea bida eterna serca Cristo, of morto eterno serca den fierno.
Esun cu kere den e Yiu ta obediente na e Tata, pasobra esun cu tin e Yiu tin e Tata.
Obedencia ta un pilar importante den nos bida , nos cas, nos famia, laga nos no lubida cu pa motibo di obediencia di Abraham, Isaac a wordo bendiciona.
Obediencia di mayornan ta trece bendicion den cas, pasobra nan a demostra cu nan ta stima Dios, y esey a sirbi como testimonio pa nan yiunan, pa nan tambe stima Dios,
Stimanan si nos curason no ta condena nos, nos tin confiansa dilanti di Dios. Y kico cu nos pidi,nos ta ricibi for di dj’E. Pasobra nos ta warda su mandamentonan y ta haci cosnan cu ta agradabel den Su bista.( 1 Juan 3:22).
Ta hopi tristo mira con hende ta haci cosnan cu no ta agrada Dios , y mira con otronan ta apoya, y hasta legalisa nan hechonan, yamando locual ta mahoso bunita, y locual ta malo bon, y locual ta bon malo.
Den Galationan 5:19-21 nos ta mira locual ta e obranan di carni, y nos tur ta compronde cu ora eseynan ta parti di nos bida, nos bida no ta agrada Dios, e ta pesey e palabra ta bisa cu participando den e cosnan ey nos lo no hereda e reino di Dios.
Ta masha importante pa nos samina nos curason y nos mente, y wak si tin algun rasco di locual ta wordo menciona den Galationan 5:19-21 y pidi Senjor ranke cu rais y tur for di nos bida, y tire leu for di nos.
Pasobra nos obedencia na Dios ta habri porta pa nos, ta duna nos crecemento spiritual, y esey ta pone cu Dios ta usa nos pa su honor y gloria.
Hende obediente ta cana den humildad, pasobra bo no por ta obediente na Dios y toch bo ta orguyoso.
Mi a pura y no a tarda, pa warda bo mandamentonan.( Salmo 119:60).
Laga nos cana na un manera digno di Senjor pa agrada Senjor den tur sentido.
Sinceramente, Pastor Marcel Balootje
