Diamars atardi, SOLO DI PUEBLO a aserca Ministerio Publico pa asina busca mas informacion di e caso di Sero Pita. Tin hopi informacion circulando riba caya, cu merece di wordo aclara lo mas pronto posibel.
E informacion general ta conoci. Polis a acudi na un asistencia pa un homber agresivo, pa cual a los tiro riba dje. Ora cu ambulance a yega, ya no por a haci nada mas y pa 11.10 anochi, un ora despues di a wordo tira, dokter a constata morto.
Bisiñanan a bisa di a scucha tres tiro, cual tambe a wordo confirma pa un miembro di famia riba red social cu tabatin tres tiro pa cual uno a alacansa Wilson, den garganta.
SOLO DI PUEBLO a haci preguntanan basico na Ministerio Publico, manera si por a confirma cu ta trata di tres tiro, y si tabatin tiro di advertencia, of cuanto bala a alcansa e victima. Lamentablemente cu na bienestar di e invetigacion, ningun pregunta por wordo contesta awor.
LANDSRECHERCE A TUMA E CASO OVER:
Segun Ministerio Publico a informa nos, cu den e tipo di casonan aki ta normal cu Landsrecherche ta tuma rienda di e investigacion considerando cu ta encera un miembro di KPA.
CURPA DEN BESLAG:
E curpa ta den beslag y autopsia no a tuma lugar ainda.
TA AWOR E INVESTIGACION A CABA DI CUMINZA:
Ministerio Publico a sigui bisa cu riba e demas preguntanan di SOLO DI PUEBLO, ta detayenan cu e investigacion lo tin di mustra. Ta demasiado tempran pa bin cu contesta. Ta awor numa e investigacion a caba di cuminza.
