Ora nos ta humilde nos ta balora nos mes,y nos ta respeta Dios y tambe pone Dios na prome lugar den nos bida.Humildad no ta nifica cana cu paña kibra of acepta tur cos na man di hende, pero humildad ta nifica pone Dios prome y Dios mes lo atende tur sobra cos pa bo.
Dios mes lo aparta y kita maldad for di caminda di hende humilde.
Mundo a yena cu orguyo ( 2 Timoteo 3:1-9) .
Hende ta stima placa mas cu Dios,
Hende ta busca nan propio interes so y no ta wak di otro.
Hende no ta pordona, pensando solamente den vengansa.
Hende ta chercha Dios.
Hende no kier scucha palabra di Dios, y ta prefera bay tras di fabula.
Hende a lubida. nan curpa ta tempel di Dios y cu Spirito di Dios ta biba den dje.
Hende ta cambia e berdad di Dios pa un mentira ( Romanonan 1:18-32.)
Un cos a keda comproba cu orguyo no ta bini di Dios (Ezekiel 28:13-19),
Hende orguyoso mester di hopi oracion pa nan arepenti, te na e momento cu Dios transforma nan curason, pa nan acepta e berdad di Dios.
Pasobra aunke un hende ta orguyoso. Dios ta bisa pa stima nos prohimo.
Tur esey nan ta bini di parti di orguyo, pesey e palabra di Dios ta bisa cu Dios ta resisti e orguyoso. y ta duna gracia na e humilde. ( Santiago 4:6).
Y no solamente esey pero e palabra di Dios ta siña nos:
Dios ta duna victoria na hende humilde ( Salmo 149:4).
Dios ta scucha hende humilde (Daniel 10:12).
Hende humilde ta crea bon relacion di amistad.( Filipensenan 2:2)
Hende humilde ta ricibi bendicion di Dios. (Proverbionan 22:4).
Hende humilde ta ricibi sabiduria ( Proverbionan 11:2).
Humildad tin mas balor cu tur clase di rikesa ( Santiago 4:6).
Ta pesey como mayor nos mester lanta nos yuinan den humildad y respet pa Dios, pasobra ora nos ta humilde,nos ta pone Dios na prome lugar, nos ta respeta otronan y nan tambe ta respeta nos, y ta esey ta locual ta falta hopi bao di nos hubentud, humildad y respet, pidimento di despensa a bay for di moda y pa motibo di orguyo violencia ta aumenta.
Humildad falso tambe ta orguyo pasobra ta para scirbi : Orguyo di un hende lo rebahe, ma esun cu ta di Spirito humilde lo ricibi honor.( Proverbionan 29:22).
Humildad ta biba den nos spirito y den nos curason, e ta wordo reconoce door di nos actitud y nos manera di papia, pa nos ta simpel y comprendibel, pasobra locual ta sali for di nos curason ta bini for di Dios.
Cu humildad nos ta aserca e trono di Dios, pasobra hende humilde ta tur ora bon bini serca Dios.Pesey humildad mester ta parti di nos hogar, y nos ta cla pa sirbi y duna un persona den necesidad.
No laga nos lubida e historia berdadero aki: Y riba un dia stipula Herodes , bisti na su paña si rey, a bay sinta riba su trono,y a cuminsa tene un discurso pa nan.Y e hendenan tabata grita ta bos di un dios y no di un hende. Y mesora un angel di Señor a dal e, pasobra e no ta duna Dios e gloria, y bichi a come y e a muri. ( Hechonan 12:21-23).
Esaki ta demostra e peliger ora humildad bandona nos bida, y nos ta cuminsa kere den orguyo, y poder di mundo y no ta ripara cu pa e motibo ey Dios ta rechasa hende.
Sinceramente, Pastor Marcel Balootje
