Un dia fructifero colma cu hopi gracia y bendicion di Dios.
”E tabata alaba Dios na bos halto, y a tira su curpa abou na suela dilanti di Hesus y a gradici Hesus”(Lucas 17,15)
Nos cu ta Cristian mester ta personanan agradecido. Un actitud di gratitud ta bini di un persona cu tin un experiencia di amor di Dios. E persona aki ta sinti un gratitud profundo pa tur loke e ta ricibi cada momento di Dios. E amor cu ta crea, cu no ta copia, ni ta bini di loke e persona a scucha, sino di su propio experiencia cu el a biba. E amor aki ta lanta nos ora nos trompeca of cay, ta yama nos pa ta hendenan liber, luchadornan pa husticia y paz. Como gradicimento nos ta demostra amor, ta pordona, ta yuda construi e Reino di Dios. Ken di nos por actua manera e unico leproso den e grupo di dies cu lo bolbe y bisa: DANKI! Sea gradecido pues, pa cada dia cu nos ta lanta y ta hala rosea, pa tur hende cu Dios ta pone riba nos caminda pa mustra nos gratitud.
Oracion: Señor nos Dios, duna nos un curason yen di gratitud y alegria pa nos por yuda nos prohimo mira bo amor refleha den nos. Amen.
