” Ta Abo ta Esun cu mester bini of nos mester sigui spera otro?”…..”Feliz ta esun cu no ta sinti’e ofendi door di Mi” (Lucas 7 19. 23)
Den e Liturgia di awe nos ta observa con Señor ta siña nos cu E ta e unico Dios legitimo cu ta salba hende di berdad, y por ilumina nos caminda cu Su luz pero tambe crea scuridad y por trece prosperidad. P’esey lo ta bon vooral den e temporada aki pa nos bira cara pa Señor maske nos ta bibando leu for di Dios Altisimo. Pasobra tur cu a rebeldia contra Señor lo bin bek cerca djE yen di berguensa como cu ta cerca Señor so victoria y poder ta reina. (Is.45,7. 21-24). Den Salmo nos ta pidi Señor pa bolbe bin biba cerca nos, Su pueblo y pordona tur nos culpa y duna nos paz pa asina Su Gloria bin biba hunto cu nos. Awor nos por conclui cu door cu nos ta den Advent nos por tin sigur cu ta Hesus mes ta Esun cu tin cu bini, y asina nos por sinti nos feliz cu e yegada di Hesus y nos por canta e cantica: ”Henter mundo lo grita di alegria dia cu Cristo bini!”
Oracion: Señor nos Dios duna nos e gracia pa nos por bolbe bek cerca Bo cu ta nos unico Dios cu por salba nos. Spirito Santo yuda nos pa nos por agrada Dios y tin respet y temor pa no falta Dios. Amen.
