Dialuna mainta durante su derecho di ultimo palabra, Otmar Oduber a habri afor riba Ministerio Publico. El a bisa cu a base di acusacion falso di Marisol Tromp, Ministerio Publico ta busca tur manera pa caba cun’e.
SOLO DI PUEBLO por a compronde cu tur e acusadonan, cu excepcion di Tiel, a presenta den Corte pa e ultimo parti. E dos Fiscalnan di Ministerio Publico a reacciona riba e defensa di e abogadonan y despues e abogadonan a reacciona riba loke e dos Fiscalnan a trece dilanti.
OTMAR TA SPERA HUSTICIA PREVALECE
Despues cu e Fiscalnan y abogadonan a hiba palabra, Otmar Oduber a haci uso di su derecho di ultimo di palabra.
Otmar a bisa Hues cu e ta haya cu Ministerio Publico ta haci todo por todo pa Otmar wordo castiga. El a bisa cu for di comienso na 2018 ora e tabata minister, el a duna permiso na Landsrecherche pa haci investigacion na DIP. El a kere cu ta pa e caso Avestruz pero a resulta cu ta caso contra e mes.
Otmar a bisa Hues cu Marisol Tromp, a wordo usa cu dos otro persona pa crea henter un storia di 28 punto pa persigui Otmar.
Otmar a bisa Hues cu e caso Malmok, el a duna orden na e dama Wever pa haci coreccion riba un asunto di tereno cu tabatin dos reservacion y awor Ministerio Publico ta culp’e di ta favorece hende.
Pa loke ta e asunto di ambtenaarnan fantasma, Otmar a bisa Hues cu tur tres empleado tabata traha corectamente p’e. Otmar a bisa cu e ta haya cu Ministerio Publico ta bin cu speculacionnan sin cu a haci investigacion corecto. El a remarca cu ta straño cu Ministerio Publico no a papia cu ningun di e hendenan cu a traha cu e tres ambtenaarnan. El a bisa cu no tin ningun prueba cu e tres hendenan no a traha. Otmar a bisa Hues cu hasta esnan sinta na front desk, cu Landsrecherche a bay puntra, nan mes a bisa cu nan sa mira e personann bay serca minister.
Otmar a bisa cu e conoce Esser pa masha hopi aña. Otmar a bisa Hues cu Esser ta un Guro den yuda hende. El a bisa cu el a keda sorprendi cu Miniserio Publico ta acusa Esser di tabata favorece hendenan di partido POR. El a bisa Hues cu Esser tabata yuda tur hende, sin worry cu color politico. Otmar ta lamenta cu Marisol Tromp a haci acusacion falso y Ministerio Publico a usa esaki pa cuminsa cu caso contra dje.
Otmar a conclui cu e ta haya cu esaki ta un persecusion tras di dje pa caba cun’e. Otmar a gradici Hues pa a honra su peticionnan pa scucha hendenan na Hues Comisario cu a trece mas claridad den e caso. E ta spera cu husticia ta prevalece.
