E pregunta cardinal cu mester haya un contesta rapido ta: Kico un delegacion di 12 hende ta bay haci na IPKO, Den Haag pa 10 dia, sin punto di agenda? Cuanto esaki ta costa nos? Ki posicion Parlamento di Aruba ta bay papia di dje, si ya Gobierno a bypass Parlamento entregando Rijkswet na Conseho di Minister anto riba dje, demisionario?
Tres minister actual conscientemente a bypass Parlamento
E delegacion di Parlamento casi tin maleta cla caba pa bay pasa 10 dia na Den Haag, Hulanda, pero na Aruba masha dia, gobierno a bypass Parlamento su autoridad y funcionamento. Pues awor Parlamento di Aruba kier bay te Hulanda pa papia riba e “consensus rijkswet”, caminda cu esaki mester a pasa prome na Parlamento di Aruba? Mas tristo ta, cu ora cu a firma e documento di lista di palabracion na 2022, cu Reino, esta; Hulanda, Aruba, Corsou, St. Maarten, 1ste y 2de Kamer, a acorda, tabatin 3 minister actual cu a firm’e: Gerlien Croes, Arthur Dowers y Geoffrey Wever. Nan tabata bon consciente di e palabracion aki firma, ucnda cu e Parlamento di cada pais, mester busca sosten na Parlamento prome cu entrega un rijkswet na Conseho di Ministro di Reino. Pues conscientemente e gobierno aki a opta pa bypass Parlamento, kitando su autoridad y funcionamento di controla gobierno.
Papia cu ken y di kico awor?
Segun Otmar Oduber, Aruba no mester lubida, cu Hulanda tin un gobierno demisionario. Riba dje den fin di siman, Hulanda a bolbe apunta un otro minister pa atende cu e asuntonan di Reino. “E pregunta ta keda e ora, kico ta e ansha pa entrega un rijkswet na un gobierno demisionario? Un gobierno cu tin apenas 20% di sosten parlamentario? Pa kico Aruba no por a warda pa eleccion y formacion prome di un gobierno di Hulanda y despues sigui negosha cu e gobierno nobo?
Rijkswet no a funciona na Corsou
“Si Aruba ta pensa cu rijkswet lo soluciona su problemanan, no wak mucho leu. Na Corsou nan a bin cu Rijkswet y no a soluciona absolutamente nada! Unico cos cu el a haci ta, pa permiti mas metemento di Hulanda den e asuntonan local. Si Reino realmente kier coopera conforme articulo 36 di nos Constitucion, duna nos e tarifa di interes reduci y Aruba na su banda, lo pone ‘begrotingskamer’ den su Constitucion y regla cu 2/3 parti di Parlamento mester bay di acuerdo pa haci cualkier cambio. Esaki ta e “garantia” real,” Otmar a expresa.
Concluyendo Otmar Oduber a cuestiona e delegacion di Parlamento: “Boso ta bay IPKO, djis pa bisa cu como parlamentario boso a bay pasa 10 dia nan Den Haag, cu placa di pueblo? Stop cu snoepreisje y haci show. Respeta Parlamento, reconstrue confiansa bek den pueblo y cana e proceso di rijkswet manera cu a palabra na 2022.
