Diabierna 20 september 2024 den Twenty Third Floor cocktail bar situa den Okura Hotel Amsterdam a tuma lugar e ortogamento di “Les Clefs d’Or” na e Arubiano Nigel Winklaar. E lo ta e promer Arubiano cu lo forma parti di e federashon Hulandes cu mas di sesenta miembro na Hulanda. Nan ta parti di e organisacion Mundial “Union Internationale des Concierges d’Hotels, Les Clefs d’Or”.
E organisacion tin mas di cuater mil miembro globalmente den, ochenta diferente pais. Esaki ta é logro mas halto, den carrera di un concierge.
Nos ta sumanemente orguyoso di su logro. Asina General Manager di Okura Hotel señor Michiel Roelfsema ta conta tur presente. Nigel a traha duru y tin hopi dedicasion pa su trabou cu a hibe na e logro aki. E ta conta tambe con Nigel a logra pa ship un Harley Davidson 3 Wheeler te na otro banda di mundo. Bou di un smile e ta subraya “just pidi Nigel e ta fix e.” E ta sigui conta con Rey Willem Alexander, pa su di diez anniversario di boda tabata desea bolo. Ningun problema Nigel ta fia e GM su auto y e ta hibe personalmente pa nan te na paleis. Nos por conta ariba Nigel, e la master e skills di brinda nos huesped un experiencia inolvidabel.
Den presencia di General Manager, Front desk manager señora Mihaela Mihaleva y demas miembro di management team, colega, amistad y famia. Nigel a ricibi su pin di Vice-presidente di vereniging Gouden Sleutel Nederland señor Eef Sparla
Conhunto cu colega ‘Hoofd Concierge’ señora Caroline de Grijs. Nigel Winklaar a marca su entrada oficial como miembro di Het Gouden Sleutel Nederland. Un paso exitoso den su carera como concierge pa Okura Hotel Amsterdam.
Un jabi di oro mas pa hotel Okura. Kende ta conta cu 3 empleado cu un jabi di oro, awor. Okura Amsterdam ta parti di Leading Hotels of the World. Y ta conta cu dos restaurant cu tin ‘Michelin star’. Un hotel caminda Nigel a habri porta y attende cu Beyonce. Famia di realtesa, hungador di futbol famoso y asina por sigui menciona.
Nigel ta conta cu pa ta miembro di les clefs d’or ta tuma su tempo. Semper e kier a logra esaki. Y awor e tine. E ta un persona cu a traha pa locual e tin, semper honesto. Actualmente e tin 13 aña cu e team di Okura unda cu tin masha confiansa den su team. Y ta gusta locual e ta haci. Su conseho ta; siña adapta, asina bo ta crece. Bo mester ta open pa cosnan nobo y pa siña cosnan nobo. Ta asina bo ta logra den bida. Y cu opportunidadnan ta yega ora cu abo ta cla pa nan. Den un capital manera Amsterdam cosnan ta cambia masha liher y bo mester keda on top di tur desaroyo pa brinda bo huesped lo mehor durante su estadia.
Di parti henter famia, amistad y coleganan. Nos ta manda palabra di exito y hopi felicitacion cu e logro aki. Nigel, nos ta orguyoso di bo!
Scirbi door di: Nyohmi van der Biezen
