Centro di Bario Noord ta invita comunidad pa forma parti di un iniciativa special cu ta combina sosten comunitario cu un oportunidad pa adkiri un corchon di bon calidad na un prijs hopi accesibel. Danki na un donacion generoso di Hilton Aruba, Centro di Bario Noord a bolbe ricibi un cantidad limita di corchonnan tamaño Double y King, cu lo wordo bendi pa recauda fondo destinado na diferente actividadnan y proyectonan comunitario.
Como un fundacion sin fin di lucro, Centro di Bario Noord ta dedica su trabou diariamente na desaroyo di bario Noord door di actividadnan social, cultural, educativo y recreativo pa mucha, hoben, adulto y adulto mayor. Pa sigui realisa e iniciativanan aki, sosten financiero ta esencial, y colaboracion cu empresanan local ta haci un diferencia importante.
E donacion di Hilton Aruba ta duna Centro di Bario Noord e oportunidad pa converti un gesto di solidaridad den un beneficio directo pa comunidad. Tur entrada cu lo wordo genera for di e bentanan lo bay directamente pa sostene e diferente programa y eventonan cu Centro di Bario Noord ta organisa durante henter aña.
E corchonnan ta disponibel pa solamente Afl. 50 pa un, un prijs simbolico cu ta haci e iniciativa accesibel pa hopi famia, mientras cu cada compra ta representa un inversion den futuro di nos comunidad.
Actualmente ta disponibel e siguiente tamaño:
● King – 2.01 x 1.86 meter
● Double – 1.95 x 1.35 meter
Pa motibo cu e cantidad ta limita, Centro di Bario Noord ta recomenda personanan interesa pa haci nan reserva cu prontitud. Reserva por wordo haci facilmente via WhatsApp na (+297) 568 2935.
Ta importante pa tur cumprado tene cuenta cu e corchonnan mester wordo busca mesun dia. Pa motibo di espacio limita, no lo tin posibilidad pa warda corchonnan. Pago por wordo haci cu ATM swipe durante e momento di recoge.
Centro di Bario Noord kier expresa su profundo agradecimento na Hilton Aruba pa e confiansa y compromiso cu nan a mustra cu e donacion aki. Colaboracion entre sector privado y organizacionnan comunitario ta crea oportunidadnan real pa fortalece e bienestar di nos isla y yuda comunidad sigui progresa.
Tambe un palabra di gradicimento ta bay na tur boluntario, donadonan y residente cu a sostene Centro di Bario Noord durante e añanan. E apoyo continuo di comunidad ta permiti cu organisacion por sigui organisa actividadnan cu ta promove participacion, union y desaroyo personal.
Centro di Bario Noord ta invita tur persona cu ta buscando un corchon na un prijs accesibel pa probecha di e oportunidad aki. Cu cada compra, bo no solamente ta hiba un producto pa cas, sino bo ta contribui directamente na proyectonan cu ta beneficia hopi hende den nos comunidad.
Hunto nos por sigui crea un Noord mas fuerte, mas uni y yen di oportunidad pa tur hende. — Noord Creciendo Hunto!
