Tur pais na mundo ta atravesando momentonan excepcional, unda un pandemia inespera, a trece impactonan grandi pa tur pais. Esaki no ta diferente pa nos pais Aruba. Nos unico fuente di ingreso ta turismo y ora nos industria a wordo paralisa door di Covid, esaki a trece cune consequencia grandi.

Posicion di Aruba ta diferente cu Curacao y Sint Maarten:

Loke por observa ta cu Knops & Rutte, sin importa cu Aruba tin un situacion completamente diferente cu Curacao y Sint Maarten, kier tira Aruba mescos Curacao y Sint Maarten manera aletria den soppi y traha un solo soppi di Curacao, Sint Maarten y Aruba.

NUNCA, NUNCA, NUNCA….

Te cu dia di awe, semper Aruba a traha duro, apesar di cualke situacion, NUNCA a fia placa na Hulanda y NUNCA a cay den default, esta yega un punto cu no por paga su debenan. Tampoco NUNCA Hulanda a tuma over debe di Aruba. Pues, e 3 x NUNCA nan aki ta essencial ora cu Hulanda mester traha un soppi, e lo mester por tene na cuenta cu e posicion di Aruba no ta igual na otronan.

ISOLITO: BO KIER DICIDI KICO MESTER HACI CU PLACA CU ARUBA TA FIA Y PAGA BEK ?

Loke ta inlogico y insolito ta e hecho cu Aruba ta fia placa, Aruba tin cu paga bek, pero bo kier pasa un ley pa manda Parlamento di Aruba cas, unda tur poder ta wordo poni den man di Minister Hulandes, Tres Hulandes na cabes, y Tweede Kamer. Tres Hulandes ta bira e gobierno nobo di Aruba, siendo cu ta pais Aruba tin cu page bek. Esaki no ta un golpe de estado? E golpe de estado aki ta wordo haci dor di Knops, door di forsa Aruba firma, pa Aruba ganja, cu Aruba ta voluntariamente di acuerdo. E realidad ta cu Aruba no ta di acuerdo. Parlamento, 21 Parlamentario no ta di acuerdo. Pues cu otro palabra, Hulanda ta dispuesto pa mata pueblo di Aruba, si no sucumbi pa nan precion y menasa? .

DI ACUERDO CU HOPI COS, PERO NO BAO CHANTAGE:

Manera MP Evelyn W Croes a bisa, tin condicionnan cu no por wordo guli. Pues, Hulanda ta actuando di mala fe, Hulanda ta buscando escalacion pa cual na final mundo lo bay atende cu Hulanda, cu ta keda responsabel pa e islanan cu nan gusta o laga di gusta. Bo kier control? Ta oke, controla! Bo kier yuda? Oke bin yuda. Bo kier bisa algo? Oke bin bisa algo. Bo sa algo mihor? Oke bin conta nos. Bo kier inverti? Oke trece bo plan. Pero HAMAS por pensa na bypass un Parlamento di Aruba, y ranca e poder pone den man di Minister Hulandes. Esaki ta un golpe de estado!

VIOLACION DI ARTIKEL 38, CONSENSUS MESTER TA REAL, NO BAO MENASA!

E actirud di Knops & Rutte ta duna hende asco, pasobra nan ta violando artikel 38 di statuut y nan no kier tende. E artikel ta papia di consensus, no tin un consenus bao menasa, precion of chantage. Pues, nan ta hopi robes bezig, violando statuut, hungando “wrong and strong”. Di otro banda algun lo bisa, pero bo no tin otro solucion y mester accepta! Wel, kisas cu lo mester accepta, pero esey no kemen cu no por protesta y denuncianan pa ta actuando como burdugu contra di Aruba.

Rutte & Knops mester reflecciona riba loke nan ta haciendo y nan mester realisa cu Aruba a bisa di TA DI ACUERDO cu hopi cos, pero tin algun cos cu ta intragabel.

Firma pa caba:

Na e grupo Firma pa caba, mester bisa na nan tur: Boso ta un decepcion pa pais Aruba. Con boso ta durf di pidi Firma pa Caba, sin sa ningun contenido? Sin sa enabsoluto kico te implicacion? Ta ki clase persona boso ta? Samina boso consenshi y porfabor no INSULTA pueblo di Aruba cu boso opinion a-lo-loco, sin sa contenido, sin sa kico te implacacion. Asina hamas y nunca boso por sirbi e pais aki na serio. Ta un payaso so lo firma pa caba, sin sa kico e ta firma pe.

LEAVE A REPLY

Please enter your comment!
Please enter your name here