Ta dificil pa tapa solo cu un dede, nos ta den tempo trabahoso, camimda nos por mira cu nos propio wowo tur locual ta sosode rond mundo. Gera, rumor di gera, terorismo, dictadura, inmoralidad, bofon di Dios, falta di temor di Dios, rebeldia,perversidad y un falta di respet extremo.
Tur esey ta exigi di tur esnan cu ta menciona nomber di Señor pa nan para firme den Señor pasobra ta solamente den Señor tin salbacion y bida eterna.
Tur otro cos cu nos por pone nos confiansa den dje, no tin stabilidad. Tur ta temporal, pasobra ta dos tipo di fundeshi tin, sea bo ta lanta bo cas riba santo y ora mal tempo bini e cas ta wordo destrui, of bo ta lanta bo cas riba e Baranca fuerte y ora mal tempo bini bo cas lo keda para.Ta tempo pa aplica sabiduria di Dios den tur locual cu nos ta haci.
Y sabiduria di Dios ta alcansabel, ora nos busca Dios di henter nos curason.
No ta pornada apostol Pablo ta bisa den Efesionan 6:10:Finalmente , sea fuerte den Señor y den e forsa di Su poder. Bisiti e armadura completo di Dios, pa boso por para firme contra e trampanan di e diabel.
Efesionan 6:13 ta bisa: Pesey tuma e armadura completo di Dios,pa boso por resisti den e dia malo, y despues di haci tur cos para firme.
Ta hopi tentacion , desviacion y manipulacion ta drentando mundo, y tur hende mester tuma e ehemplo di sirbi Dios constantemente manera Daniel den capitulo 6 pa asina por vence tur e plan nan di e enemigo.
Si nos ta pa firme den Señor nos lo tin pas ( Filipensenan 4:7).
Si nos ta para firme den Señor nos lo tin seguridad ( 1 Juan 5:11-13).
Si nos para firme den Señor no lo tin forsa . ( Isaias 40:31).
Si nos para firme den Señor nos lo tin confiansa ( Isaias 15:58).
Si nos para firme den Señor nos lo tin speransa ( Jeremias 29:11).
Si nos para firme den Señor nos lo tin goso ( Santiago 1:2-3).
Si nos para firme den Señor nos lo tin victoria ( 1 Corintionan 15:57).
Un bida di oracion, y ayuno ta pa un parti importante, pa nos por para firme den Cristo Hesus, pasobra Dios su boluntad ta nos santificacion, pa tur hende abstene nan mes di tur clase di inmoralidad sexual, y para firme, den integridad y respet,
Evita di tur manera di gaña otro, papia malo di otro, rechasa tur locual ta envidia y malisia, y pordona otro mescos cu Dios a pordona bo.
E enemigo ta cana manera un leon cu ta gruña buscando ken e por debora, ta pesey tur hende mester compronde, cu sin un bida comprometi cu Dios, nan lo no por para firme den e caminda di Dios.
E enemigo ta usa trabao pa hala hende for di caminda di Dios, pasobra hopi ta bay tras di nan entrada pa nan cas, nan bida y famia, ta aparta, ta pone trabao prome cu Dios.
Pesey hopi ta traha dos trabao, pero poco ta compronde kico e enemigo kier haci cu nan bida.
Solamente, comporta boso na un manera digno di e evangelio di Cristo pa sea cu mi bin serca boso, of mi keda ausente, mi por tende di boso, cu boso ta para firme den un spirito, luchando hunto pa e evangelio. ( Filipensenan 1:27).
No tin goso mas grandi pa mi di cu tende cu mi yuinan ta cana den e berdad. ( 3 Juan 4).
Sinceramente Pastor Marcel Balootje
