Diaranson mainta, 5 minuut pa 10’or mainta, Parlamentario Benny Sevinger a wordo sorprendi na Smith & Dorlas koffieshop na De La Salle Straat pa autoridadnan di Landsrecherche.
Nan a drenta e koffieshop y a cana bay na su mesa y a informe cu e ta keda deteni.
A lesa pe su derechonan y asina a tume over, pone den auto y transporte pa warda di polis na Sta. Cruz.
Normalmente lo mester a hibele oficina di Landsrecherche na Vondellaan, pero pa motibonan di seguridad, a opta pa hibe warda di Sta Cruz.
E operativo di investigacion y interogacion lo wordo haci na warda di Sta.Cruz mes.
Na mes momentonan autoridadnan arma a transporta varios caha di documento pa warda di polis, pa asina e investigadornan por cuminza confronta e ex minister cu documentonan palpabel, pruebanan contundente cu tin den su contra.
Benny Sevinger a haci su mes culpabel, pa hungo cu otronan, facilita corpucion, unda tabata otroga tereno na “nv” y despues su amigonan tabata bende e “nv”, cobrando miyones di dollars.
E practica riba su mes por ta legal, si e sosode un bes, pero ora cu e intencion cambia y a haci esaki 20 ves, e ora e “oogmerk”, e meta ta pa facilita corupcion.
Y cada ves esaki a sosode den su gang! Gaby, Sussebeek, Leoncita.
Te awor tabatin 12 detencion den caso Avestruz cual ta bay den historia como un otro caso grandi di corupcion cu a sosode bao gobierno di Avp.
E caso riba su mes, no ta wordo accepta pa e partido berde, pasobra nan ta nenga di wak e realidad. Nan ta pretende cu ta persecucion politico. Pruebanan ta mustra cu ta corupcion na granel. E partido a laga sa cu nan kier gana eleccion pa stop investigacion.
Benny Sevinger tambe a pidi den un video pa pueblo vota Avp, pa asina Avp por bay ruim op boel na Ministerio Publico.
