Diamars mainta den sala di Parlamento tabatin un reunion informativo. Parlamentarionan di Fraccion di MAS y Accion21 a acusa Prome Minister Evelyn Wever-Croes di metemento den Ministerio Publico. Pa e motibo aki, e mandatario hunto cu Minister Rocco Tjon tabata den sala pa duna informacion y pa contesta pregunta.
Parlamentario di Fraccion di MEP, Setty Christiaans-Yarzagaray durante e reunion a elogia Minister Presidente como tambe Minister Tjon pa e nivel con nan a contesta e preguntanan, a pesar di e emocion, e weganan y e insinuacionnan politico cu a sobresali.
“E nivel di contestacion, e nivel di trece e facts, manera otro ta pidi. Documentacion pa mustra, esaki ta e nivel y e diferencia cu mi ta kere pueblo kier wak den gobernantenan, den politiconan”, e parlamentario a expresa.
Durante e reunion un di e parlamentarionan den oposicion a bandona e sala pasobra e no ta aproba e nivel di un contra e otro, pero el a haci’e cuminsando e reunion na banda di oposicion caba. Pero ora el a realisa cu tin un cierto show andando, e n’ kier a forma parti di e show mas y ta bandona e sala pasobra e tin otro politica, otro nivel segun e, Christiaans-Yarzagaray a declara.
El a sigui bisa cu e parlamentario aki tin tres aña ta bin ta haci e mesun cos, e mesun cos cu oposicion ta haci. Bisa cu e banda di sala di coalicion tur cos ta malo y e banda di sala di oposicion nunca tin algo bon di bisa of mas ainda nunca ta trece solucion tampoco. Pues no tin nada nobo den locual e parlamentarionan aki ta haci.
Pueblo ta cansa di wak e nivel aki pasobra na final di dia pueblo kier pa un gobernante trece e berdad, presenta ‘facts’, e pruebanan. E forma di keda tira palabra riba otro, papia di raport sin lesa manera lider di fraccion di MAS a haci, na final a tira su mes den pia pasobra nan no ta lesa documento. E no ni sa mes cu e raport di ARA cu ta referi na dje ta critica su mesun maneho tempo e tawata responsabel pa e maneho di Serlimar. “Increibel e nivel cu nos tin akiden. Siña lesa, esey ta un cos cu sigur ta parti di nos trabao”, el a remarca.
Parlamentario Christiaans-Yarzagaray a puntra e mandatarionan kico e gobierno aki lo por haci pa evita cu cierto politiconan por tilda e instancia Ministerio Publico. Por ehempel, a splica, Parlamento a pasa diferente ley caba pa purba traha na e fundeshi di integridad.
Fraccion di MEP a traha na ley di financiamento di partidonan politico despues cu den medionan social por a wak cu cierto politico a haya sumanan substancial cu no ta parse di a pasa door di e reglanan di MOT. Tambe a pasa e ley di screening di minister, cu a laga un minister trauma pasobra su screening tabata riguroso, pero esey ta pasobra e ley ta diferente, el a indica.
E parlamentario a menciona tambe cu e parlamento actual a pasa e ley di ‘Ombudsman’, cu 11 hende so votando p’e. Oposicion no tabata di acuerdo pa e wordo realisa na un nivel mas halto, na nivel di ‘Staatsregeling’ cu mester 14 voto. Ta parse e ora cu nan no kier pa pueblo haya sa nan cosnan, cu ta unda instituto manera Ombudsman por ricibi como defensor di pueblo. Asina falta pa menciona algun cos mas, pero asina a bin ta traha na dje, manera ‘begrotingskamer’.
Den e caso aki por a mira con Prome Minister a bin cu ‘facts’ cu ta loke pueblo ta pidi.
“Ami ta para akinan pidiendo pueblo algo. E pais aki ta stabil. Tin un stabilisacion den hopi area, manera e area financiero, economico pero tambe riba e area di integridad mes. Den e area financiero sigur nos mester para keto, pasobra pandemia a siña nos hopi. Ban siña di esakinan!”
Na otro banda di mundo tin gueranan ta tuma luga. Nos mester keda un pais stabil preparando pa, ohala Dios kier pa no, pa situacionnan cu Aruba mester wanta shocknan atrobe, a agrega.
Christiaans-Yarzagaray a puntra tambe: kier cambio pa e tipo di hendenan cu ta trece mata ariba mesa pa crea un show den sala di Parlamento? Kier pa e pais aki bay den direccion di un hende cu ni tin conocemento di e aparato publico? of kier bay den e direccion di e lidernan anterior cu a hinca Aruba den debaclenan financiero astronomico y cu despues mester a bay bati na porta di Hulanda, cu tur e condicionnan cu a bin despues?
Esey kier? Of kier hende serio dunando splicacion al caso y cu prueba? “Esey pa mi, cu tur sinceridad, ta un liderazgo cu ami kier traha bao dje. Esey ta locual nos ta priminti pueblo. Un stabilidad, no solamente financiero, pero den mundo aki tambe, di integridad.
“Ban keda den e stabilidad aki. Ban keda traha na leynan pa purba mas cu nos por, evita e partinan di corupcion y cu ta haci nos dolor, si, pero e ta traha y sabiendo cu pa mañan nos ta haci’e miho pa bo, Pueblo”, asina e parlamentario a finalisa su disertacion.
