Parlamentario Eduard Pieters (PPA) a critica e comparacion entre Rijkswet HOFA y Onderling Regeling cu Eric van der Burg, Staatssecretaris van Binnenlandse Zaken en Koninkrijksrelaties a uza y Pieters ta keda alerta pueblo Arubano cu esaki ta minamento di nos autonomia. Pa Eduard Pieters, e asunto aki no ta solamente algo legal, sino ta un cuestion di dignidad nacional. Segun Pieters, esaki ta un comparacion cu no solamente ta huridicamente incorecto, sino tambe peligroso.
Hulanda kier bende algo diferente
Pieters a bisa cu un Onderling Regeling basa riba articulo 38 di nos Statuto di Reino ta un acuerdo administrativo entre e partnernan den Reino pa yuda otro y na un manera boluntario, mientras e Rijkswet HOFA ta cambia profundamente e relacion constitucional entre Aruba y Hulanda y tin consecuencia directo pa nos autonomia. “E no ta mesun cos. Gobierno ta pidi confianza, pero no ta duna transparencia!” Pieters a expresa.
Onderling Regeling sin un base di Rijkswet a funciona
Pieters a sigui bisa cu Aruba despues di COVID-19 a cera un acuerdo cu Hulanda pa yuda Aruba den ehecucion di plannan pa haci Aruba su aparato gubernamental mas fuerte. E Onderling Regeling a resulta den Landspakketten cu e aña aki a wordo evalua. “Di e evaluacion por a conclui cu e colaboracion entre e dos paisnan den Reino a bay bon. A logra hopi a base di respet mutuo y cu sinembargo ainda falta algun trabou si tene cuenta cu ta trabounan complex.” Eduard Pieters a elabora. Mas ainda a constata cu Aruba a tuma su responsabilidad na serio y a haci di e proceso uno propio (ownership). “Si gobierno anterior y gobierno actual ta mantene na regla y leynan vigente pa loke ta trata presupuesto di pais Aruba. E evaluacion di e colaboracion entre Aruba y Hulanda a bay bon. Nos conoce surplus, nos debe compara cu nos producto interno bruto (debt to GDP) ta sigui baha cu stapnan grandi y nos economia ta stabil, Nos ratings pa financiamento ta miho y nos ta mantene na e LAft, hasta Staatssecretaris di Hulanda Van der Burg a bisa cu Aruba ta bay hopi bon y den cierto sentido hasta miho cu Hulanda. Pakico e insistencia pa sigui negocia un Rijkswet HOFA? Dicon nos no por cera un Onderling Regeling pa traha riba nos Begrotingskamer y Hulanda yuda nos presta placa na un interes abou riba mercado internacional di cual Aruba lo paga Hulanda bek?” Pieters a puntra.
Parlamento ainda no sa kico ta negocia
Mas cu e contenido di e posibel Rijkswet HOFA “nobo”, Pieters a expresa preocupacion cu Parlamento ainda no sa exactamente kico ta wordo negocia. Segun Pieters, Gobierno ta move cu urgencia den un trayecto constitucional, mientras e representante legal di pueblo, ainda no a haya claridad riba e cambionan cu por afecta e leynan local y e posicion constitucional di Aruba.
“Nos no sa kico ta cambia ainda.” Pa Pieters, esaki ta inaceptabel. “Bo no por pidi Parlamento pa confia den un proceso cu Parlamento mes no conoce.”
Autonomia no ta un tema pa negocia den silencio
Pieters a recorda cu PPA tin e autoridad pa mantene e mesun posicion pa bisa NO na HOFA y NO na LWHO. “Nos no tabata den gobierno ni parlamento pa mas di binti aña. Nos NO a firma un bestuurlijk akkoord caminda articulo 38 cu ta mina nos Constitucion a wordo crea bou presion di Hulanda y tampoco nos a firma Rijkswet HOFA core mand’e Rijksministerraad cu e mesun presion di Hulanda y presion di partido FUTURO (sino no tin Gobierno AVP-FUTURO). Segun Pieters, PPA nunca lo acepta ningun proceso cu ta debilita nos Status Aparte cu a forma nos Constitucion, tampoco nos Statuto di Reino y principalmente e autonomia di Aruba. “Nos como parlamentario a huramenta pa proteha nos Constitucion, nos leynan y nos autonomia. Mi deber constitucional ta pa salvaguardia esaki.”
