E aña escolar nobo a habri cu preocupacion den e sector di educacion debi na e falta di atencion y di recursonan necesario pa e scolnan. Segun e expresionnan di parlamentario Dangui Oduber, ta lamentabel cu mientras e caha di Gobierno ta conta cu un surplus di 700 miyon florin, no tin suficiente fondo aloca y presupuesta pa drecha e situacion den enseñanza.
Preocupacion pa infrastructura y condicion di scolnan
E parlamentario a señala cu varios scol rond di e isla ta den mal estado y cayendo den otro, cu speelplaats y gymzaal den total decadencia. Pueblo y e sector di enseñanza a spera mas atencion y accion di parti di gobierno y specialmente di minister Gerlien Croes pa soluciona e retonan aki.
Ademas, e parlamentario a recorda e promesa di Partido Futuro pa instala solar panel na e scolnan pa asina reduci e gastonan di energia y evita cu mayornan tin cu sigui paga pa e aircogeld. Oduber a señala cu, despues di dos aña escolar bou di e maneho di e gabinete AVP-Futuro, e proyecto aki no a wordo ehecuta den ningun scol ainda. Consecuentemente, mayornan mester sigui paga pa aircogeld, e Alivio cu a wordo priminti nunca a yega.
700 miyon florin na surplus sin prioridad pa educación
Lamentabel ta e echo cu gobierno ta landa den un surplus di 700 miyon florin pa inverti den e prioridadnan di nos pais, mientras cu educacion, cu sigur ta un prioridad principal, ta keda descuida. Nos mester por aloca fondonan pa:
- mehora e infrastructura di e scolnan;
- brinda e maestronan miho condicionnan laboral y miho salario;
- provee mas hermentnan pa nan por educa nos muchanan.
E ta obvio cu educacion no ta un prioridad pa gobierno y mucho menos pa minister Gerlien Croes. Si nos mira kico ta wordo aloca den e presupuesto pa enseñanza, esaki ta un bofta pa tur educador. Un otro aña escolar ta habri caminda maestronan mester saca placa for di nan propio cartera pa por prepara nan klasnan.
E situacion aki ta bira mas preocupante considerando cu e caha di Gobierno ta conta cu un surplus di 700 miyon florin. Si e pais tabata pasando den un crisis financiero, e falta di recurso lo por tabata comprendibel; sin embargo, no ta hustificabel pa señala un falta di fondo pa educacion mientras e cifranan oficial ta mustra e existencia di e surplus aki. E pregunta fundamental ta keda: unda e placa aki a bay? Dicon no tin fondo pa enseñanza y pakico educacion no ta wordo poni como un prioridad nacional?
Pa conclui, parlamentario Oduber a señala cu Minister Croes a resulta un desapunto pa e sector debi cu e fundeshi di nos pais, cu ta educacion, no ta ricibiendo e atencion cu e merece.
E prioridadnan di e ministerio ta aparenta di ta mas enfoca riba biahenan den exterior en bes di trece solucionnan concreto cu ta beneficia Aruba. Cu un total di 16 biahe den un periodo di 16 luna, e ta di cuestiona kico realmente a wordo logra pa e sistema educativo den tur e biahenan cu e la realisa.
