Parlamentario di AVP, Clifford Heyliger, a haci uzo di su tempo personal durante un estadia reciente na Barranquilla, Colombia, pa realisa un bishita di cortesia cerca Representante Gersel Luis Pérez Altamiranda, presidente di e Comision Legal Afro den Congreso di Colombia. E encuentro a enfoca riba intercambio di conocemento y experiencia tocante posicion politico, participacion social y promocion di comunidadnan di decendencia Afro-Caribeño.
Heyliger ta enfatisa cu su compromiso cu pueblo di Aruba no ta limita solamente na bishitanan oficial of actividadnan protocolar. Tambe durante bishitanan personal den exterior, e ta busca activamente oportunidad pa establece relacion y conexion cu por contribui na desaroyo social, cultural y economico di Aruba. Segun el, e tipo di iniciativa y cooperacion internacional por habri caminda pa oportunidad nobo riba tereno di cultura, emprendemento y turismo, cu por tin impacto directo riba comunidadnan local.
Durante e combersacion cu Pérez Altamiranda, a discuti con comunidadnan di decendencia Afro a logra posiciona nan mes riba e agenda politico, y con promocion di identidad cultural por genera efecto positivo riba desaroyo economico, turismo cultural y fortalecemento di comunidad. E intercambio di experiencia aki ta considera valioso pa Aruba, specialmente den contexto di diversidad cultural y participacion comunitario.
Parlamentario Heyliger a expresa su aprecio pa e apertura y liderazgo di Representante Pérez, y ta spera cu pronto lo tin resultado concreto for di e conexion aki. El a subraya cu e tipo di logro y iniciativa den e area aki no solamente lo beneficia pueblo di Aruba en general, pero specialmente comunidad di San Nicolas, unda inversion den desaroyo cultural, participacion social y actividad economico por crea oportunidad real pa crecimiento y bienestar di residentenan.
Finalmente, Heyliger a indica cu e lo sigui busca oportunidad pa aprende di experiencia internacional y crea puente di cooperacion cu por fortalece posicion di Aruba y contribui na un futuro mas inclusivo y prospero pa tur su comunidadnan.
