Durante e reciente tratamento di e presupuesto di Servicio di Obra Publico (DOW) den Parlamento, miembro di Parlamento Dennerich Kelly a enfatisa cu infrastructura no ta un tema solamente tecnico, sino un realidad diario pa tur ciudadano di Aruba.
“Infrastructura no ta algo cu hende ta pensa riba dje de bes en cuando,” Kelly a bisa, “pero ta algo cu tur hende ta sinti tur dia. Den e caminda pa traha, den siguridad di nos muchanan y den rapidez cu servicio di emergencia mester por yega nan destino.”
Segun Kelly, ta importante pa nos ta honesto riba e situacion actual. Estado di camindanan, problema di awa den barionan y frustracion den comunidad ta visibel y reconoci pa tur hende. “E reto ta grandi y nos no por nenga esey, pero nos ta tuma esaki na serio,” segun Kelly.
Na mes momento, e ta pone enfasis cu e enfoke no mester keda solamente riba loke a bay malo. “E pregunta principal pa nos como pais no ta solamente kico a faya, sino con nos ta bay soluciona esey di forma structural.”
Kelly a indica cu un manera di trabou cu ta solamente reacciona riba problema, a largo plazo ta mas caro y menos eficiente. P’esey el ta boga pa un cambio pa un sistema mas preventivo, cu planificacion cla y un vision a largo plazo cu por sirbi como base pa desaroyo duradero.
Durante su intervencion, Kelly tambe a menciona ehempel concreto for di diferente bario, manera Caya Frere Arnold y Alexius, Sabana Basora, Kas di Paloma y Ponton, unda residentenan ta sinti e impacto di problema di infrastructura tur dia. Na mes momento, el a expresa confianza cu otro bario nan tambe lo wordo inclui den e planificacion di DOW. “No ta trata di un solo bario, ta trata di henter Aruba,” el a enfatisa.
Ademas di su disertacion, Kelly a presenta un mocion den cual el ta pidi gobierno pa dentro di 30 dia presenta un overzicht cla y accesibel di tur proyecto di infrastructura planea pa 2026. Den e motie, el ta pidi informacion tocante presupuesto, meta y planificacion di cada proyecto, pa tanto Parlamento como ciudadano por sigui y compronde con ta traha cu fondo publico. Ademas, lo entrega un carta adicional pa fortalece e liña di transparencia y siguimento di e proceso.
“Na final, ta trata di confianza,” Kelly a bisa. “Confianza cu gobierno no solamente ta haci plan, pero tambe ta logra resultado visibel pa pueblo.”
Cu su intervencion, Kelly ta posiciona su mes como un parlamentario cu no solamente ta identifica problema, pero cu ta busca solucion y colaboracion. “Pueblo di Aruba no ta spera perfeccion,” el a conclui, “pero nan ta spera progreso.
