Durante su bishita na Hulanda, Mike Eman a sigura miembronan di Tweede Kamer cu nan por conta riba aprobacion di e ley nacional (LWHO), afirmando cu e tin sosten di 11 parlamentario pa esaki. Cu e declaracion aki, Eman a señala na Tweede Kamer cu nan por prepara pa avansa cu e Rijkswet HOFA.
Banda di esaki, Eman a garantisa tanto Tweede Kamer como Gobierno Hulandes cu nada lo ser cambia na e leynan, no obstante e conseho di Raad van Advies di Aruba ni e observacionnan di Raad van State di Hulanda.
Un compromiso cera prome cu reces
Minister Eman a duna un compromiso formal na Hulanda cu e LWHO lo ser trata prome cu reces parlamentario, y cu Presidente di Parlamento Marlon Sneek lo percura pa esaki. E declaracion aki ta lanta preguntanan serio tocante e proceso democratico ya cu e pueblo di Aruba no tabata na altura di ningun di esaki.
Loke cu ta mas preocupante: e mesun 11 parlamentarionan cu Eman ta uza como garantia, ta hustamente esunnan cu anterior a vota pa manda e ley pa Raad van State. Nan a crea e caminda. Awe nan ta ser uza como prueba cu e caminda lo keda liber.
Van den Burg a confirma: e resultado ta cla caba
Staatssecretaris Eric van den Burg a enfatisa cu e asunto no tin su interes directo. Sin embargo, segun Parlamentario Vrolijk, e declaracionnan di miembronan di Tweede Kamer mes ta mustra un nivel di siguransa y di arogancia cu ta yama atencion. Van den Burg a bay asina leu di declara cu e tin sosten di partidonan na Hulanda pa pasa e ley.
E pregunta cu ta keda: si Aruba a reduci su debe di 117% pa 61% bou di su propio ley — e nivel mas abou desde 2011, confirma pa Raad van State mes, pakico un ley permanente di Reino ta necesario?
Eman mester bin duna cuenta
Awe, Eman ta bek na Aruba participando den Arubadoet pero no ta duna cara den Parlamento pa splica kico exactamente el a compromete nos na dje na Hulanda.
Pa e motibo aki, Parlamentario Vrolijk lo pidi formalmente un reunion publico cu Sr. Eman pa e bin aclarea su declaracionnan, pa asina e pueblo y e sindicatonan por evalua e berdad di loke a pasa.
E cuestion ta simpel: si e 11 voto ta garantisa, y si e LWHO ta pasa prome cu reces, sin debate publico, sin posibilidad di amienda, e pueblo di Aruba tin derecho di sa kende exactamente a tuma e decision aki, y riba kico e ta basa.
