No ta importa e situacion cu bo por hanja bo mes aden , Dios tin poder pa restaura y reemplasa tur cos.
Hopi biaha hende ta papia di tur locual nan kier drecha, pero ora ta yega na nan bida, matrimonio y famia, bo ta tende e mesun hende ta bisa cu e cos ey no ta drecha mas.
Y nan ta lubida cu restauracion, sanacion, liberacion y reemplasamento ta solamente y unicamente den man di Dios.
Den Jeremias 24:7 ta para scirbi: lo mi duna nan un curason pa conose Mi,pasobra Ami ta Senjor, y nan lo ta Mi pueblo,y Ami lo ta nan Dios,pasobra nan lo bolbe serca Mi cu henter nan curason.
Dios mes ta dera nos pasado y duna nos un futuro briyante den Cristo Hesus, pesey no worry ken ta biba den bo pasado, pasobra hopi biaha e enemigo ta husa hende pa keda pega den bo pasado, husando como strategia pa bo trompica.
Pero tene bon cuenta ken ta donjo di bo futuro y mantene bo futuro sigura den Cristo Hesus.
Amigo tin hopi , pero no tin mihor amigo cu Cristo Hesus, e ta e Amigo cu ta duna su bida pa nos tur.Amigo di confiansa, Amigo di yudansa, Amigo di Speransa, Amigo cu ta cumpli tur momento, Y ora nos ta Su amigo E tambe ta yama nos amigo pasobra nos ta haci Su boluntad.
Antes tabatin trabao di bodyman cu bodyfiller, awor tur piesa di body di auto ta wordo reemplasa, pa asina e auto mantene un balor halto, asina tambe nos Dios ta capas y tin poder di reemplasa organo den nos curpa, pa asina nos keda intacto manera e crea nos den su inmagen y semehansa.
Salmo 103:3 ta para scirbi : Kende ta pordona tur bo inikidatnan, Kende ta cura tur bo malesanan.
Un pica cu no wordo confesa no por wordo pordona, y e ta keda eynan pa molesta consenshi di hende.
Pasobra ta bon pa tur hende corda locual e palabra di Dios ta bisa den 1 Juan 1:9 cu si nos confesa nos picanan, E ta fiel y husto pa pordona nos, nos picanan y libra nos di tur inhusticia.
Den man di Dios tur cos por wordo restaura, pesey ta masha importante oracion den nos bida, den cual nos ta pidi intervencion di Dios, pasobra no tin nivel mas halto cu nos por bay serca dje, cu no ta nos Dios Todopoderoso.
Den Isaias 41:10-11 Dios ta duna gran promesa di restauracion bisando: No tene miedo pasobra Mi ta cu bo, no desmaya pasobra Mi ta bo Dios, lo Mi fortalesebo,si lo Mi yuda bo.si, lo Mi sostene bo cu Mi man drechi di husticia.
Mira tur esnan cu ta rabia cu bo,lo keda brongosa y deshonra , esnan cu ta pleita cu bo, lo ta manera nada y lo perece.
Dios no ta haci wega, Dios ta serio, mas bo aumenta bo fe den Dios, mas bo mira Dios su grandesa den bo bida, pasobra Dios ta fiel, y Dios ta lus y no tin nada, nada di scuridad den Senjor.
Ta Senjor ta esun cu ta determina tur cos, Su promesa ta berdad, Su palabra nunca no a faya, e ta Dios riba tur cos, Den Jeremias 32:27 Senjor ta bisa; Mira Ami ta Senjor riba tur carni, acaso tin algo mucho dificil pa Mi.
Den Jeremias 32:17 ta para scirbi Ay Senjor Dios,Abo a traha e cielo y tera pa medio di Bo gran poder y pa medio di bo brasa extendi, nada ta mucho dificil pa Bo.
Sinceramente, Pastor Marcel Balootje
