Durante e conferencia di prensa semanal, parlamentario Pieters a trece un otro punto fuerte padilanti. Aki ta trata e critica riba loke Gobierno ta yama Fase Dos di e reforma educativo.
Segun Pieters, mientras Gobierno tabata duna hopi atencion riba e aspecto salarial di Fase Uno, poco of nada ta conoci tocante e siguiente fase. “Tur hende a tende di Fase Uno. Pero ken sa kico Fase Dos realmente ta encera?”
PPA ta cuestiona unda e plan concreto pa profesionalisacion, acompañamento y desaroyo continuo di maestro ta.
Den Fase Dos supuestamente Gobierno lo a sigui traha hunto cu SIMAR y SEPPA riba restructuracion salarial. Loke Minister di Enseñansa mester compronde cu mas placa so, no lo percura pa e maestronan por duna enseñansa di calidad. Claro cu mas cen fin di luna ta na su luga, pero mester traha tambe riba siguridad di e maestronan, ademas di oportunidad di crecemento profesional y salarial den un structura mas simplifica y cu ta stimula e maestro duna enseñansa di calidad. Mester por ancra den nos leynan cu un scol y su directiva mester percura pa tin un proceso ciclico di Recurso Humano. Pa un maestro y cabesante por haya su guia necesario, wordo motiva y keda evalua tur aña of cada pasa tanto tempo pa e por bin na remarca pa un aumento salarial y mas ainda pa e wordo stimula pa duna enseñansa di calidad.
Segun Pieters, si Gobierno no inverti den e hende cu ta para dilanti klas y na cabes di un scol diariamente, ningun reforma lo logra e resultado cu pueblo ta spera.
PPA no kier solamente critica, pero kier contribui
Na final di su rueda di presna, Pieters a lamenta cu repetidamente fraccion di PPA ta uza su instrumentonan den Parlamento di Aruba pa medio di manda pregunta, pidi reunion den comision cu Minister di Enseñansa, pero no ta haya e contesta ni e apertura cu e partido ta spera. Segun Pieters, e obhetivo nunca tabata pa crea confrontacion. “Nos kier ta parti di e solucion, pasobra cu enseñansa, desaroyo y formacion di nos muchanan y hobennan no mester hunga politikeria.”
Pieters a enfatisa cu, door di su propio experiencia den enseñansa, e ta dispuesto pa contribui cu idea, conocemento y experiencia pa mehora e calidad di educacion na Aruba. Tin hopi plan riba mesa. Plannan carga pa e campo di enseñansa y hasta esnan cu ta traha directamente of indirectamente cu enseñansa. “Loke falta den e Gabinete AVP-FUTURO ta curashi pa tuma accion.”
Ta bon pa Minister di Enseñansa reuni cu stakeholder
No por ta asina cu Minister di Enseñansa no ta reuni cu SIMAR y SEPPA pa loke ta e fase dos di restructuracion salarial. Ni di papia mes cu e directivanan di scol. E como Minister di Enseñansa ta finalmente responsabel pa enseñansa, no su colaboradornan. Ta bon pa semper minister tene nan cerca como aliado pasobra nan ta representa e maestro/docente di Aruba. Ademas, nan por influencia implementacion di cualkier reforma exitosamente, Parlamentario Pieters ta finalisa.
