PPA ta preocupa cu e cambio den Ley di Comptabilidad: “Nan ta mina e autoridad fundamental di Parlamento pa controla Gobierno. Ta manera nan kier pa nos firma e cheque, pero laga e suma habri.” Cu e ehempel simpel aki, pero contundente, parlamentario di PPA Eduard Pieters ta splica pakico e ta considera e cambionan proponi den Ley di Comptabilidad un asunto hopi mas grandi cu un modificacion tecnico.
Segun Pieters, loke ta den wega ta autoridad fundamental di Parlamento di Aruba pa controla con Gobierno ta uza placa publico. “Ami no ta pidi nada mas, ni nada menos, cu pa por haci mi trabou debido como parlamentario: controla Gobierno.”
Articulo 2: unda e control ta cuminsa
Pieters ta referi specificamente na Articulo 2 di e legislacion di comptabilidad. Segun su splicacion, e articulo ta obliga Minister di Finansa pa percura cu informacion necesario ta aparece den presupuesto y den otro articulo e cuenta anual, pa Parlamento por controla con ta uza placa publico.
Pero den e cambio proponi, segun Pieters, precisamente e nucleo ey ta afecta.
E ta cuestiona pakico ta saca parti di e regulacion for di ley y pas’e pa un landsbesluit enbes di haci articulonan aki mas skerpi y detaya.
Pa Pieters, e diferencia ta fundamental: un ley ta pasa via Parlamento; un landsbesluit no ta duna Parlamento e mesun rol legislativo. “Bo ta kita e autoridad fundamental di Parlamento ora bo ta kita e articulo aki y dia di mañan cualkier minister por cambia e lansbesluit sin pasa Parlamento. “
Cuanto ta bay pa Polis? Si. Pero na kico?
Pieters ta splica e consecuencia cu un ehempel concreto. Parlamento por haya den presupuesto cu Polis ta ricibi cierto cantidad di miyon florin. Pero pa controla Gobierno realmente, no ta suficiente pa conoce solamente e suma total.
Parlamento mester por mira na kico e placa ta destina: cuanto pa inversion, cuanto pa otro gasto y cua ta e destinacion concreto.
Segun Pieters, e cambionan anterior ya a move e presupuesto mas den direccion di budget holder y e itemnan general. E preocupacion awor ta, cu ta debilita e specificacion mas ainda.
“Nos como fraccion di PPA kier mira e detaye di e placa. No pa administra Gobierno, sino pa controla Gobierno,” Pieters a enfatisa.
Raad van Advies tambe a critica
Pieters ta señala cu Raad van Advies tambe a expresa critica riba e cambio proponi. Esey ta otro señal cu Parlamento no por trata e asunto como un modificacion administrativo sin consecuencia. Su preocupacion ta, cu poco poco, mediante cambio legal, Parlamento ta perde instrumento pa eherce su funcion di control.
Y e ta conecta esaki cu un patronchi mas amplio di falta di responsabilisacion di Gobierno dilanti Parlamento.
“No ta Hulanda. Ta Aruba.”
Un di e puntonan politicamente mas fuerte di Pieters ta, cu e no ta pone responsabilidad di e cambio aki riba Hulanda. “Mi no mester control di Hulanda. Ta aki aki na Aruba nos institutonan mester controla.”
Segun Pieters, Aruba tin su propio Gobierno, Parlamento, Algemene Rekenkamer, Raad van Advies, etc.. Y den e orden democratico ey, ta Parlamento mester por sigui e placa publico y controla esaki.
P’esey e ta rechasa cualkier idea cu Parlamento mester acepta menos informacion simplemente, pasobra sistema presupuestario ta cambia.
Un cheque habri
Pieters ta reduci e debate tecnico na algo cu cada ciudadano por compronde: “Gobierno ta pidi Parlamento autorisa gasto, pero Parlamento mester sa cuanto, pa kico y despues controla unda e placa realmente a bay. “Firma manera un cheque y laga e suma habri,” segun Pieters, ta precisamente loke Parlamento no mester acepta. Pa PPA, esaki no ta un discusion di contabilidad solamente. “Ta un cuestion di democracia. Pasobra ora Parlamento perde bista riba e placa, Parlamento ta perde parti di su poder pa controla Gobierno,” Eduard Pieters a finalisa bisando.
