Recientemente, fraccion di Partido Patriotico di Aruba (PPA) a ricibi bishita di Michel Nicolaas, docente, kende ta den proceso di skirbi un buki amplio tocante bida, obra y legado di Juancho Yrausquin.
Pa por reconstrui e historia aki cu seriedad, Nicolaas a haci investigacion profundo na Aruba, Corsou y Hulanda. El a consulta diferente archivo, organisacion y fuente historico, entre otro Archivo Nacional Aruba, fuente na Corsou y diferente instancia na Hulanda. A traves di e investigacion aki, el a logra reuni un cantidad balioso di informacion tocante bida personal, famia, trayectoria politico y aporte di Juancho Yrausquin na desaroyo di Aruba.
Durante su bishita, Nicolaas a presenta e diseño preliminar di e buki. E publicacion lo contene e retrato- y textonan historico cu practicamente no tabatin na Aruba, ilustracion, e acontecimentonan importante di su bida y tambe e stamboom di famia Yrausquin. Asina, e buki no lo ta solamente un relato biografico, sino un obra documental cu por sirbi como fuente di informacion pa e generacionnan presente y futuro.
E prome meta di e bishita tabata pa informa fraccion di PPA oficialmente tocante e investigacion y progreso di e buki. E di dos meta tabata pa intercambia idea tocante con por promove e publicacion y con por informa pueblo di Aruba mihor tocante Juancho Yrausquin: no solamente tocante kende e tabata, sino principalmente tocante kico el a nifica, a planifica y realisa pa nos pais.
Juancho Yrausquin tabata un berdadero visionario. Hopi di e ideanan cu el a defende mas cu 70 aña pasa ainda ta visibel den e rumbo cu Aruba ta sigui awe. El a reconoce trempan e balor di turismo como motor di desaroyo. Awe turismo ta e pilar principal di nos economia. El a aporta na desaroyo di suministro di awa mediante un planta di desalineacion, un adelanto cu awe ta parti fundamental di Aruba su infrastructura. Ademas el a inicia pensioen pa nos grandinan. Semper, el a papia y traha pa proteccion di nos medio ambiente, nos flora y nos fauna. Banda di esaki ainda tin e historia di Juancho Yrausquin pa loke ta su trabou riba e otro islanan den Reino.
Esaki ta lanta e preguntanan importante: Con leu nos a yega cu e vision di Juancho Yrausquin? Nos ta sigui e rumbo cu el a indica, of tin e areanan, caminda nos mester retoma su ideanan? Y con nos ta garantisa cu nos muchanan conoce e historia di e homber, cu a yuda pone base pa tanto parti di Aruba moderno?
Proximamente, fraccion di PPA lo sigui dialoga cu Michel Nicolaas pa wak con por sostene e proceso pa imprenta y publicacion di e buki, uzando e canalnan disponibel tanto na Aruba como den Reino Hulandes.
Tambe a trece dilanti e posibilidad pa uza e informacion reuni pa desaroya ‘lesbrieven’ pa e scolnan. Di e forma aki, e studiantenan por siña no solamente tocante Juancho Yrausquin como personahe historico, sino tambe tocante su papel den desaroyo economico, social y infrastructural di Aruba.
Un pueblo cu no conoce su historia, no por compronde completamente su presente ni trata su futuro. P’esey, e iniciativa di Michel Nicolaas ta merece reconocemento y sosten. Documenta legado di Juancho Yrausquin ta mas cu publica un buki: ta conserva un parti esencial di memoria di Aruba y pasa e vision di un gran lider pa e siguiente generacionnan.
