– Diadomingo 7 di juli, durante otro exitoso encuentro di Ban Topa, e biaha aki na e districto di Dakota, Parlamentario Hendrik Tevreden a duna un presentacion interesante indicando riba varios topico entre otro, e trabou di Parlamento di Aruba y con partido MEP ta LOGRANDO.
![](https://solodipueblo.com/wp-content/uploads/2024/07/Hendrik-Tevreden_2-1024x528.png)
Señor Tevreden a cuminsa su discurso enfocando riba e logronan di Gobierno y con pais Aruba a “bons bek” asina lihe di e pandemia y e mega debe cu e Gobierno anterior a laga atras. Un ehempel cu e Gobierno actual ta logrando su metanan ta cu por a duna 11.7 % bek na e ambtenaar. Durante su discurso e parlamentario a splica riba entre otro riba e importancia di e trabou di Parlamento cual uno ta pa traha of aproba un ley y tambe controla Gobierno. Tambe el a splica riba e tema hopi den actualidad cu ta e ley di Ombudsman, cu pa despues di mas di un decada, e parlamento actual ta bay logra pone un Ombudsman pa pais Aruba. Parlamentario Tevreden a subraya riba e importancia pa un parlamentario mantene comunicacion cu e pueblo, duna oido na e voz di pueblo y entrega mocionnan.
![](https://solodipueblo.com/wp-content/uploads/2024/07/Hendrik-Tevreden_1-1024x536.png)
Parlamentario Tevreden tambe a splica di e reunion tripartiet cu recientemente el a atende y e importancia di esaki pa Aruba y di e di App di control di prijs di productonan basico cu Gobierno a introduci, cu ta di bon uzo pa e consumidor.Tambe el a indica riba trabounan cu Gobierno a haci den districto di Dakota, manera e renobacion di Stadion Guillermo Prospero Trinidad, e apertura di e cancha di basketball y otro futuro plannan cu tin pa e districto di Dakota. Ta importante tambe pa menciona riba e proyecto pa drecha Avenida Milio Croes, cu ya ta andando y asina tin hopi proyecto mas pendiente. “Ora bo tende nos ta bisa cu nos ta LOGRANDO, esey kiermeen cu nos ta logrando pa bo, pa bo bisiña, y pa esnan cu no por logra pa nan mes”, Parlamentario Tevreden a termina bisando.
![](https://solodipueblo.com/wp-content/uploads/2024/07/Hendrik-Tevreden_3-1024x552.png)