Presidente di Comision di Turismo di Parlamento di Aruba, parlamentario Jennifer Arends-Reyes, a anuncia cu e comision a inicia su trabounan pa e aña parlamentario nobo cu un reunion di planning. Como siguiente paso, e comision lo reuni cu Aruba Tourism Authority (ATA) pa ricibi un presentacion general tocante e sector turistico, cu atencion particular pa e plan, perspectiva y pronosticonan pa Aruba.
E reunion di planning ta sirbi pa defini prioridadnan, coordina e topiconan cu mester ricibi atencion y prepara un agenda di trabou cu ta conecta cu e desaroyonan y necesidadnan di nos pais. Segun Arends-Reyes, un bon preparacion ta esencial pa e comision por cumpli cu su responsabilidad di sigui e sector y duna seguimiento na asuntonan di importancia pa Aruba.
“Como Comision di Turismo, nos tin e responsabilidad pa sigui e sector di cerca, haci pregunta y contribui na un dialogo cu ta duna claridad y direccion na nos trabou,” Arends-Reyes a expresa.
ATA, como un stakeholder principal den turismo, usualmente ta e prome instancia cu e comision ta invita pa un intercambio general. E proximo presentacion lo ofrece miembronan un panorama di e situacion di e sector, e perspectivanan pa e proximo periodo y e plannan cu ta na caminda. E informacion aki lo sirbi como base pa profundisa den e oportunidadnan y retonan cu Aruba tin dilanti.
Pa Arends-Reyes, e trabou parlamentario tocante turismo mester mantene un conexion cla cu e realidad di comunidad. Turismo ta toca e bida di hopi famia, e actividad di empresanan local y e oportunidadnan di trabou y desaroyo pa nos hendenan. P’esey, e evaluacion di e sector mester tene cuenta tambe cu su contribucion na bienestar di Aruba.
“Nos kier compronde con e sector ta desaroya, cua ta e expectativa pa e añanan cu ta bin y con e plannan ta contribui na bienestar di Aruba. E hende cu ta traha den turismo, e empresario local y nos comunidad mester keda central den e conversacion,” el a subraya.
Cu e inicio di e trabounan aki, Arends-Reyes ta reafirma su compromiso pa promove intercambio di informacion, pregunta y seguimiento dentro di Comision di Turismo. E meta ta pa contribui na decisionnan informa y un desaroyo turistico cu ta crea oportunidad y balor pa Aruba y su comunidad.
