Minister di Relacionnan den Reino, Educacion, Hubentud, Innovacion y Deporte, sra. mr. Gerlien Croes, ta anuncia y yama oficialmente bonbini na sr. Edgar “Gachi” Erasmus, kende lo asumi e funcion di director nobo di Instituto Biba Saludabel y Activo (IBiSA) desde awe dia 1 di october 2026.
Despues di un trayecto di aplicacion, entrevista y varios luna di preparacion y coordinacion entre Departamento di Recurso Humano (DRH) y Ministerio, sr. Erasmus lo inicia oficialmente su funcion como director di IBiSA, encabesando e instituto cu ta desempeña un rol importante den promocion di movecion, deporte y salud na Aruba.
Minister Gerlien Croes ta expresa su satisfaccion cu e nombramento aki y ta enfatisa importancia di un liderato comprometi cu e desaroyo di deporte y bienestar di nos comunidad.
“Mi ta yama Gachi un cordial bonbini y ta desea Gachi hopi exito den e reto nobo aki. Nos ta premira pa traha hunto, sigui fortalece IBiSA y crea mas oportunidad pa nos muchanan, hobennan, adultonan y grandinan por biba un bida mas activo y saludabel”, Minister Gerlien Croes a expresa.
Cu e nombramento di sr. Erasmus, Ministerio ta premira pa continua na fortalece e colaboracion cu IBiSA, federacionnan deportivo y diferente partnernan y stakeholders, cu e meta di sigui promove un cultura di movecion y deporte den nos comunidad.
Minister Gerlien Croes ta felicita sr. Edgar “Gachi” Erasmus y ta desea su persona hopi exito den su funcion nobo como director di IBiSA.
Hunto nos ta sigui traha pa un Aruba mas activo y saludabel!
