Den su calidad como Presidente di e Comision di Reino y Relacionnan Exterior di Parlamento di Aruba, parlamentario Jennifer Arends-Reyes a anuncia cu un delegacion oficial di Aruba lo participa den e proximo encuentro di IPKO (Interparlementair Koninkrijksoverleg), cu lo tuma lugar na Hulanda na comienso di juni.
IPKO ta un plataforma importante unda delegacionnan parlamentario di Aruba, Corsou, Sint Maarten y Hulanda ta reuni pa discuti temanan cu ta toca e futuro di e Reino Hulandes y fortalece e cooperacion entre e diferente paisnan. Durante e encuentro, delegacionnan ta intercambia idea, comparti preocupacionnan, presenta “best practices” y traha riba solucionnan comun tocante asunto di interes general, manera sostenibilidad, economia, educacion, siguridad y relacionnan internacional.
Sra. Arends-Reyes a enfatisa cu participacion di Aruba den IPKO ta esencial pa Aruba por sigui haci su voz resona y defende e interes di nos pueblo. “IPKO ta un momento importante pa Aruba pa reafirma e necesidad di un relacion basa riba respet, igualdad y cooperacion real den Reino. Aruba no ta solamente un partner; Aruba ta un pais cu su propio realidad y prioridadnan cu mester tuma na cuenta,” segun Arends-Reyes.
Segun e Presidente di Comision, e delegacion Arubiano lo enfoca riba diferente tema importante, incluyendo igualdad den Reino, implementacion di acuerdonan y reformanan cu tin impacto directo riba Aruba, y e necesidad pa un enfoke realistico den cooperacion financiero y institucional. Tambe lo hiba preocupacionnan di pueblo Arubiano riba mesa y comparti punto di bista tocante diferente asunto pa garantisa cu decisionnan cu ta tuma na nivel di Reino ta sigui refleha e interes di Aruba.
Sra. Arends-Reyes a agrega cu IPKO ta representa tambe un oportunidad importante pa fortalece relacionnan diplomatico cu parlamentarionan di otro paisnan den Reino y pa crea un dialogo mas directo, habri y constructivo.
E delegacion lo consisti di miembronan di Parlamento di tur fraccion, representando e prioridadnan di Aruba durante e reunionnan oficial. Actualmente e Comision di Reino y Relacionnan Exterior a reuni y ta den preparacion pa e encuentro. Ademas, ta wordo planea diferente bishita di trabou na Hulanda relaciona cu, entre otro, studiantenan Arubiano na Hulanda y contacto cu diferente instancia diplomatico y Europeo, cu apoyo di nos Minister Plenipotenciario y Kabinet di Aruba.
Parlamentario Jennifer Arends-Reyes a conclui indicando cu Parlamento ta mira participacion den IPKO como un paso importante pa fortalece e rol di Aruba den Reino y pa sigui lucha pa un futuro mas stabiel, husto y sostenibel pa nos pais.
