Un plan den forma di un mocion pa un posibel solucion.
Diahuebs mainta, pa 9or di mainta Parlamento a continua su reunion pa trata e ley presupuesto 2022 di pais Aruba. Tabata toca turno na e ministerionan di Minister Ursell Arends y tambe di Minister Dangui Oduber. Prome cu e reunion publico aki mi a haci 103 pregunta na tur ministerionan, pa asina mi por a haya contestacion riba mi observacionan y cuestionamento riba diferente aspecto di e ley di prespuesto 2022. Ta e motibo pakico mi a haci 34 pregunta mas na ministernan durante e reunion publico aki cu mi a sinti cu no a haya e debido contesta. Tambe ma haci algun pregunta nobo tocante di nos medio ambiente, situacion den salubridad y turismo.
Un plan den forma di un mocion pa un posibel solucion.
No solamente mi a vocifera esakinan pero tambe mi a presenta un mocion cu por ta un posibel solucion pa e crisis economico y social cu nos pais ta pasando den dje. E ta algo cu mi a encurasha mi coleganan den parlamento pa haci enbes di semper hunga politica insincero cual no ta dirigi pa soluciona ni yuda cu nada. Ta pesey mi a presenta un mocion den Parlamento pa urgi gobierno pa prome; “sondea e posibilidad pa construi un waf turistico pa cruceronan por yega San Nicolaas pa asina diversifica economia di San Nicolaas y Aruba. Si e sondeo aki ta factibel, pa facilita un tereno adecua na San Nicolaas pa por realisa e proyecto aki. Si por yega na un acuerdo cu e liñanan crucero por para na waf turistico di San Nicolaas. Mi ta kere fuertemente den potencial di e proyecto aki. Un oportunidad pa haci esaki lo significa den diferente desaroyonan y benficionan pa pais y sigur San Nicolaas prome.
Algun beneficio di e realisacion di un Waf Crucero pa San Nicolaas.
Pa di prome un expansion den e capacidad y cantidad pa pais por ricibi crucero. Kisas awor maximo por dok como 4 crucero, sinembargo si lo tin un waf pa crucero na San Nicolaas e capacidad lo por wordo expandi por ehempel cu un of mas. Siguientemente, e lo ta increibel e fluho di inversion inmenso cu esaki lo por provoca si un proyecto di e magnitud aki wordo aproba. Por ehempel, por start empresanan di tours pariba, restaurantnan nobo, souvernir shops, boutique di paña, tiendanan di marca, joyerianan, expansion di shownan cultural, mas actividad pa nos bandanan musical, benta di artesania local, y mucho mas por bini establece nan mes den caya pariba na San Nicolaas y alrededor pa asina brinda e turista e experencia bunita di nos pais. San Nicolaas cu su arte, cuminda y historia tin hopi pa ofrece e turista. Por ultimo e desaroyo aki lo crea hopi cupo di trabao, oportunidad pa empresanan nobo, ideanan nobo, y inversionan cu lo embeyece San Nicolaas su infrastructura, su edificionan y e bunita efecto di por wak su caya y tiendanan yen di hende atrobe. San Nicolaas tin hopi pa ofrece y sigur merece esaki!
