Parlamentario Setty Christiaans-Yarzagaray, di fraccion di MEP, ta sumamente contento di wak cu un iniciativa di su persona formula den un mocion den Parlamento a ser realisa.
Durante tratamento di presupuesto 2023 di pais Aruba dia 9 di november di aña 2022, Parlamentario Christiaans-Yarzagaray a formula un mocion treciendo un deseo cu e tin di wak realisa, cu ta pa aseguradonan di AZV por consulta nan propio datonan medico a traves di un aplicacion digital, por ehempel via AZV app cu ta un aplicacion existente.
E idea cu Setty Christiaans-Yarzagaray a formula den un mocion ta pa gobierno pone mas atencion riba e mundo digital y data, su accesibilidad y uzo. Esaki den combinacion cu e tempo ey Aruba a ricibi e instruccion di Hulanda pa reduci gastonan di AZV unda gobierno di Aruba a introduci un plan cu diferente reforma (5-wave model) den AZV cu e meta pa regula gastonan.
Pues Parlamentario Setty Christiaans-Yarzagaray a wak esaki como un posibel herment cu por aporta na e pensamento y maneho preventivo den cuido medico na Aruba y pa AZV door di uzo di informacion. Ademas cu esaki por contribui na yuda controla gastonan di AZV y pa e asegurado mes.
Pesey e tempo ey a urgi gobierno di Aruba pa sondea e posibilidad pa introduci e metodo digital aki.
Parlamentario Setty Yarzagaray a pensa e tempo ey riba e AZV app mes mirando cu e informacion ta trata di informacion medico di e asegurado, cu ta den man di AZV mes. A comprende cu esaki a wordo realisa via e plataforma di Health App, pero a keda cu e mesun proposito.
Awor cu e proyecto wordo realisa, e aseguradonan di AZV por consulta nan propio datonan y resultadonan cu e meta cu e por yuda controla uzo di e servicio medico pa AZV pero tambe di por tin su informacion na man. Otro meta ta cu e asegurado por ta mas consciente door di consulta su propio informacion y asina aporta na prevencion y na e maneho preventivo di Gobierno pa cu salud.
“Un palabra di danki ta bay na Gabinete Wever-Croes II y minister di Turismo y Salud pa e realisacion di e proyecto aki pero tambe pa tin e oido pa deseonan cu ta bin di Parlamento por medio di mocion”, Parlamentario Setty Christiaans-Yarzagaray a termina gradiciendo.
