“Un tema cu ta determina e futuro financiero y autonomia di Aruba no por keda sin wordo debati den e propio Parlamento.”
Fraccion di MEP a manda awor 10 rappel oficial pa yama un reunion publico di Parlamento pa trata e proposicion di Rijkswet HOFA. Sinembargo, te awe, e reunion ainda no a wordo yama. Un rappel ta un recordatorio manda na presidente di Parlamento pa cord’e di e peticion original cu nos a haci na su persona 8 luna pasa y enfatisando cu ainda nos ta warda pa e keda yama
Pa MEP, esaki ta mas cu un asunto di agenda. Ta trata di respeta e Reglement van Orde, e derecho di parlamentarionan y e responsabilidad di Parlamento pa controla y debati riba temanan di importancia fundamental pa Aruba.
E Reglement van Orde ta stipula cu ora por lo menos tres miembro di Parlamento pidi un reunion, e Presidente ta obliga pa yama e reunion. No ta un asunto di preferencia personal of politico, sino di cumpli cu e reglanan cu ta regula e funcionamento di Parlamento.
GOBIERNO A INDICA CU HOFA LO TA CLA DEN NOVEMBER
Durante e tratamento di e Prome Presupuesto Supletorio, Gobierno a indica cu durante e luna di november e negociacionnan relaciona cu HOFA lo ta cla y cu lo presenta e reaccion riba e conseho di Raad van State y Raad van Advies na Parlamento.
Fraccion di MEP ta spera cu e compromiso aki, e biaha aki si lo wordo cumpli cu ne, y cu Parlamento no lo wordo confronta un biaha mas cu e echo cu ya decisionnan a wordo tuma y aprobacion a keda duna na Hulanda.
Mester preveni cu un decision di tanto importancia pa Aruba ta wordo hiba dilanti sin un debate parlamentario amplio y na tempo. Pa Fraccion di MEP, no ta suficiente pa Gobierno anuncia cu lo presenta e tema na Parlamento. Parlamento mester tin e oportunidad real pa trata, cuestiona y debati e contenido, e implicacionnan y e consecuencianan di e proposicion aki prome cu cualke decision wordo tuma.
UN TEMA DI AUTONOMIA MESTER WORDO TRATA NA ARUBA
Durante e bishita di e Comision Permanente di Parlamento Hulandes na Parlamento di Aruba na october 2026, e Comision a enfatisa cu e debate tocante HOFA mester wordo hiba na Aruba mes. Pa e Comision tabata hasta incomprendibel cu un tema di tal magnitud y importancia ainda no a wordo trata den Parlamento di Aruba.
MEP ta comparti e punto di bista aki. HOFA ta directamente relaciona cu e autonomia financiero di Aruba y cu e futuro di nos pais. Ta precisamente pa e motibo aki Parlamento di Aruba mester tin un papel central den e debate.
Fraccion di MEP ta bolbe haci un yamada na e Presidente di Parlamento pa cumpli cu su responsabilidad y yama e reunion solicita sin mas tardansa. Un copia di e peticion a wordo dirigi tambe na Gobernador di Aruba.
Aruba no por papia di autonomia y na mes momento laga su propio Parlamento sin e espacio pa un debate.
E futuro di Aruba merece un debate transparente, amplio y democratico. Y e debate aki mester tuma luga den Parlamento di Aruba.
Fraccion di MEP ta contra HOFA!
