Dia 21 di september 2026 nan ta pidi nan mesun gobierno pa mantene rebaho di gasolin y dia 9 di oktober 2026 nan ta vota contra pa e rebaho.
Pueblo ta paga mas na pomp, mas na supermercado, y gobierno no ta actua pa caba!
Den e reunion publico di awe riba e prome cambio di presupuesto 2026, Parlamentario Shailiny Tromp-Lee (MEP) a bisa cla: “Nan ta gasta e placa prome, despues nan ta bin pidi permiso. Y pueblo ta keda warda.”
E cifranan ta papia cla
Di januari te september 2026, gasolin a subi di Afl. 2,107 pa Afl. 3,124 pa liter (+48.3%). Diesel a subi di Afl. 1,885 pa Afl. 3,376 pa liter (+79.1%). E trucknan cu ta trece bo cuminda na supermercado ta uza diesel. E placa aki touch bo cartera directamente!
Gobierno a baha e prijs di combustibel di 8 di april te 11 di augustus 2026, y gobierno mes a bisa cu esaki tabata necesario pa proteha pueblo su poder di compra. Toch, entrante 12 di augustus 2026, gobierno a stop cun’e.
Pensa riba esaki: e impuestonan BBO, BAZV y BAVP tur ta den e prijs na pomp. Mas caro bo gasolin, mas entrada gobierno ta haya pa cada liter.
AVP mes a puntra
AVP den su preguntanan, relaciona cu e cambio di presupuesto, dirigi na nan gobierno dia 21 di september 2026 nan a puntra:
“Waarom wacht de regering met een beslissing over verlenging van de accijnsverlaging tot een nota van wijziging of tweede begrotingswijziging, terwijl zij vandaag al weet dat de geopolitieke onzekerheid voortduurt en dat deze maatregel rechtstreeks verlichting kan bieden aan de portemonnee van de bevolking en de kostenpositie van onze economie?”
Den palabra simpel: pakico boso ta warda pa extende e rebaho si boso sa caba cu e situacion den mundo no ta bay drecha y cu e rebaho lo yuda pueblo su cartera directamente? AVP mes ta bisa: e rebaho ta yuda, no warda mas.
E mocion cu nan a vota contra
Menos cu 3 siman despues, dia 9 di october 2026 mi persona a presenta un mocion cu ta pidi exactamente esey: reintroduci e rebaho riba gasolin y diesel, cu efecto inmediato y pa resto di aña. E mayoria di AVP-Futuro a vota contra.
Dicon? Dia 21 di september 2026 bo ta pidi bo gobierno pa yuda pueblo, y dia 9 di october 2026 bo ta vota contra. Anto awe bo ta bin pidi yudansa pa mama y tata di famia y pa e taxistanan y busnan chikito. Ki seriedad tin den esaki?
Pueblo no ta bobo. E pregunta grandi ta: kico ta bay pasa despues di 1 di januari 2027? Ya caba ta papia cu awa, coriente y gas ta bay subi.
Laat, sin claridad y sin contesta
E “voorjaarsnota” mester a bini y keda trata prome cu reces na juli. Awe nos ta na november. Parlamento ta wordo poni pa aproba riba papel gastonan cu a wordo haci caba. Ora MEP tabata den gobierno, nos a drecha e procedura y nos tabata cumpli cun’e.
Otro topiconan cu mi a duna atencion:
• Falta 57 dia pa Minister-President Mike Eman bay, y ni Parlamento ni pueblo no sa ken lo tuma e stuur over. Transparencia no ta un fabor, e ta un responsabilidad.
• Riba HOFA, nos ta haya sa via prensa of via Tweede Kamer na Hulanda.
• Riba hospital, e situacion ta alarmante desde februari y gobierno no a bin Parlamento y ta te fi di september a inicia cu un investigacion pa por actua y bin cu solucion.
• Riba salario minimo pa hoben, tur fraccion a aproba un mocion na september 2025 y Minister Cicilia a priminti 1 di januari 2026. Aña 2026 ta casi caba y nada ainda. Minister, cumpli cu e mandato di Parlamento!
Pueblo no ta pidi pa wega politico. Pueblo ta pidi un gobierno cu ta actua y cu ta salvaguardia cartera di su pueblo. MEP lo sigui para firme pa bo.
