Parlamentario Xiomara Maduro a tuma nota cu Aruba su ‘Voz di Oro’ señor Jossy Brokke a bay descansa den brasa di Señor y ta desea di manda palabra di condolencia na su famia, tur hende cu a stim’e y na e mundo artistico di Aruba cu ta perde un gran baluarte.
Parlamentario Maduro ta corda con como ex Minister di Cultura e tabata tin e honor di por a entrega Jossy un reconocemento den nomber di Fundacion Go Cultura, e premio Crioyo di Oro. Pa e ocasion special aki como mandatario di Cultura ela a canta un parti di Jossy su cantica “Mi Pais” den cual tin e plegaria pa reconoce bo yiu di tera, pa mustra su respet y aprecio special pa un composicion di Jossy cu ta toca hopi curason na Aruba.
Parlamentario Xiomara Maduro ta gradici Jossy pa su amor pa Aruba y ta desea su famia y amigonan hopi forsa den e dianan cu ta sigui. Cu Jossy su alma sosega den Paz di Señor.
