Parlamentario Xiomara Maduro ta felicita Monumentenfonds Aruba (MFA) pa su 30 aniversario di existencia, y ta expresa su aprecio pa e trabou importante cu e fundacion a haci den preservacion di nos herencia cultural.
Durante e ultimo 30 aña, MFA a percura pa restaura, mantene y conta e historia di 19 monumento historico, entre nan California Lighthouse, Stadhuis, School 1888, Weststraat 15, Steenweg 19, Cas Tan Tin, Cas Veneranda, Ecury Complex, Forno di Calki y varios otro simbolonan importante di nos historia nacional.
Como ex Minister di Cultura, Maduro ta contento di por a contribui cu e apoyo necesario na Monumentenfonds, pa varios monumento wordo restaura of haya nan mantencion necesario, pa nan historia sigui bibo den nos comunidad. “Cada monumento restaura den su gloria ta conta nos su historia. Cultura bo tin cu bib’e y monumentonan nos tin cu cuida nan pa nan sigui conta nos historia,” Maduro a declara.
Parlamentario Xiomara Maduro ta gradici directora saliente sra. Anne Witsenburg pa su dedicacion y ta yama un caluroso bon bini y ta desea sra. Petra Davis hopi exito como e directora nobo di MFA.
Masha pabien Monumentenfonds Aruba y danki pa 30 aña di dedicacion na preserva nos pasado pa nos futuro.
