Parlamentario Xiomara Maduro ta hiba un discurso pa felicita UNOCA cu su 39 aniversario

Den un ambiente di orguyo y reflexion cultural, Parlamentario Xiomara Maduro a hiba un discurso durante e celebracion di e 39 aniversario di UNOCA (Union di Organisacionnan Cultural Arubano), un institucion fundamental den e desaroyo y preservacion di cultura Arubano.

Durante su discurso, Maduro a expresa cu gran sentimento su admiracion pa e trabou grandi cu UNOCA a bin ta haci pa hopi aña. “UNOCA no ta solamente un organisacion,” ela bisa, “pero e ta e alma di nos identidad cultural, un compas pa nos nacion.”

Como ex-Minister di Cultura, Maduro a relata su experiencia personal cu e fundacion, destacando su rol den promocion di arte, proteccion di herencia cultural, y pa stimula y inspira creatividad. A nombra diferente proyecto significativo cu UNOCA a realisa, di fondo pa artista nobo, te na preservacion di tradicion oral y participacion internacional.

“UNOCA a compronde cu cultura ta bibo y ta evoluciona. Ta via nos idioma, nos musica, nos arte y nos historia oral cu nos ta mantene nos identidad,” ela enfatisa. Maduro tambe a trece den recuerdo momentonan crucial manera e apoyo emocional y artistico durante e pandemia, via e programa UNOCA Cares.

Un momento special den e discurso tabata dedica na reconocimento personal. Xiomara Maduro a gradici Ray Anne Hernandez, ex-directora di UNOCA, pa su “liderato firme y vision cla,” y tambe Lupita Gil, representante di Ministerio di Cultura den e directiva, pa su “conseho sabio y bon colaboracion”.

UNOCA, segun Maduro, a logra pone Aruba riba e mapa cultural regional y global via colaboracion cu UNESCO y participacion den evento internacional manera Dutch Caribbean Digital Heritage Week. “E voz di Aruba ta wordo scucha y respeta, danki na e trabou cu UNOCA ta haci,” Maduro a destaca.

Den su palabra final, Maduro a invita comunidad y lidernan pa sigui brinda sosten y balor na nos cultura Arubano: “Den un mundo cu ta cambia constantemente, nos cultura ta e anker cu ta wanta nos firme. Ta nos cultura ta mustra ken nos ta, y ken nos por bira.”

Maduro a caba su discurso cu un deseo sincero: “Feliz 39 aniversario na UNOCA, y cu nos por bolbe celebra e 40 aña hunto, Dios mediante.”