Den su conseho riba Rijkswet HOFA, Raad van State ta tuma como punto di salida, e Bestuurlijk Akkoord den cual ta contene e consenso entre Aruba y Hulanda pa yega na un manera nobo di organisa e supervision financiero na Aruba. Sinembargo, e conseho no ta trata e pregunta mas fundamental: e consenso aki tabata realmente boluntario, of tabata un consenso obteni bou presion financiero y politico?
No ta partnernan igual a negocia
Pa contesta e pregunta aki, no por ignora e contexto den cual Aruba a negocia cu Hulanda. Durante y despues di e crisis di COVID-19, Aruba tabata depende di e apoyo financiero di Hulanda. Esaki a crea un desekilibrio den e negociacionnan cu no por wordo ignora ora ta papia di consenso, ya cu no ta partnernan igual a negocia.
Presion pa kita supervision financiero
Un punto importante ta cu Hulanda a uza e futuro di e supervision financiero como medio di presion. Hulanda a menasa Aruba di kita e supervision financiero, si Aruba no ta bay di acuerdo cu e supervision financiero den e “bachi legal nobo” di Rijkswet.
Durante añanan, supervision financiero independiente a contribui na confianza di inversionistanan y mercado financiero internacional den Aruba. Si e supervision aki wordo kita di un dia pa otro, Aruba por a perde un elemento importante di credibilidad financiero. E menasa aki di parti di Hulanda, a debilita e posicion negociado di Aruba y a aumenta e presion pa acepta e trayecto cu Hulanda tabata propone.
Menasa di default
Tambe tabatin e riesgo cu, sin un acuerdo cu Hulanda, e refinanciamento di e debe di COVID-19 no tabata garantisa. Esaki por a pone Aruba den un peligro directo di default riba su obligacionnan financiero; un situacion asina no solamente lo a afecta e relacion cu Hulanda, sino tambe lo a manda un señal negativo na otro creditornan y inversionistanan internacional. E consecuencia potencial di e escenario ey a pisa hopi den e proceso di negociacion, sigur despues cu e menasa aki a bin “preto riba blanco” den un carta di Secretario di Estado Van Huffelen.
E pregunta cu falta contesta
Pa e motibo di tur e menasanan aki di parti di Hulanda, Parlamentario Xiomara Maduro ta cuestiona si realmente nos por papia di consenso ora un pais ta negocia bou menasa di perde supervision financiero, bou riesgo di default y bou gran dependencia financiero. Segun Parlamentario Maduro, Raad van State a analisa e aspecto legal di e Rijkswet HOFA, pero no a contesta e pregunta cu ta e base di tur e debate aki: Aruba realmente tabatin e libertad pa bisa “no” na e Bestuurlijk Akkoord?
Si e pregunta aki no wordo haci, e ora un aspecto esencial di e historia constitucional reciente di Aruba ta keda sin un evaluacion critico. Pasobra prome cu por conclui cu tabatin consenso, mester determina si e consenso aki tabata boluntario, of si e tabata e resultado di circunstancianan cu practicamente no a laga espacio pa otro opcion.
