Dios ta e husto hues cu ta paga cada hende segun cu e merece pa su actonan. E so ta mira curason di hende y sa loke nos ta pensa. Nos no mag di punta dede riba nos prohimo pasobra ora nos haci esey tres dede ta mustra riba nos y un ta mustra na shelo. Hopi biaha nos mes ta haci net e cosnan cu nos ta husga otro hende pe. P’esey awe den e Evangelio Hesus ta adverti nos pa nos no ta mescos cu e fariseonan y expertonan di ley cu ta papia un cos y ta haci otro. Pero Dios kier trece un cambio den nos bida. E kier cambia nos curason duro pa nos no sigui haci loke ta robes. Dios den Su inmenso bondad y misericordia ta desea pa tur hende wordo salba y haya bida eterno. Cerca Dios so nos alma ta na paz y ta den djE so nos por confia semper y deshoga nos curason cerca djE. P’esey rumannan laga nos pone tur maldad un banda y haci nos maximo esfuerso pa scohe semper loke ta bon y asina converti y cuminsa biba mas conforme e berdad, segun Palabra di Dios.
Oracion:Señor, pa intercesion di La Birgen di Fatima nos ta roga Bo pa nos por converti y cuminsa biba mas segun Evangelio di Cristo. Amen.
