Durante e ceremonia di restauracion di Iglesia Adventista di Shete Dia na Bernhardstraat, Pastoor Virgil Sams a comparti un mensahe enfoca riba historia, compromiso comunitario y significado di e edificio pa generacionnan di participante.
Den su intervencion, Pastoor Sams a indica cu e iglesia, cu tin casi 90 aña di existencia, ta mas cu un edificio, pero un luga cu a hunga un rol importante den bida di comunidad a lo largo di tempo. Generacionnan a reuni na e luga aki pa actividadnan spiritual y social, fortaleciendo lasonan entre comunidad.
Pastoor Sams a enfatisa cu e restauracion di e edificio ta representa un esfuerso pa conserva su balor historico y su funcion como punto di encuentro pa comunidad.
Un otro momento significativo durante e ceremonia tabata e reconocimento di Eric Principaal, kende a hunga un rol importante den desaroyo di e congregacion na Bernhardstraat.
Segun Pastoor Sams, Principaal a yega Aruba den aña 1963 y, a lo largo di añanan, a involucra activamente den actividadnan di Iglesia. Despues di bira miembro di e congregacion, el a contribui den diferente rol, incluyendo orientacion di estudio, apoyo na actividadnan comunitario y participacion den organisacion interno di iglesia.
Durante su trayectoria, Principaal a aporta na mantenimento di e edificio y a contribui na diferente iniciativa cu a fortalece funcionamiento di e congregacion. Su compromiso y presencia constante a forma parti di desaroyo di e comunidad na e lugar.
Sams a subraya cu e historia di Principaal ta pone enfasis riba importancia di participacion activo di individuo den comunidad, indicando cu e balor di un institucion ta basa riba e contribucion di su miembronan.
Como culminacion di e ceremonia, Iglesia Adventista di Shete Dia na Aruba a entrega un plakkaat di reconocimento na Eric Principaal como muestra di aprecio pa su dedicacion y contribucion a lo largo di añanan.
