Miembro di Parlamento pa AVP, Sra. Otami Thomasia, a pone enfasis riba importancia di responsabilidad, transparencia y implementacion efectivo den maneho di sistema di awa sushi (wastewater) di Aruba, un di e componentenan mas critico — pero frecuentemente menos visibel — di nos infrastructura nacional.
Segun Thomasia, e sistema di tratamento di awa sushi ta fundamental pa proteha salubridad publico, preserva nos medio ambiente y sostene desaroyo economico di pais. Esaki ta particularmente relevante pa region manera San Nicolas, unda crecemento economico y actividad turistico ta aumentando y, consecuentemente, presion riba infrastructura esencial ta bira cada vez mas grandi.
Den e contexto aki, revitalisacion di San Nicolas ta sigui move dilanti. Nos ta mira mas inversion, mas actividad economico y proyecto importante manera e expansion di Secrets Baby Beach Aruba, cu lo contribui na aumento di bishitante y dinamica economico den region. Segun Thomasia, esaki ta un desaroyo positivo cu mester sostene.
Pero, segun su persona, revitalisacion semper mester bay hunto cu responsabilidad institucional y preparacion infrastructural.
Desde juli 2024, e sistema di tratamento di awa sushi a pasa bou di maneho di Aruba Wastewater Sustainable Solutions (AWSS). E transicion aki a crea hopi expectativa den comunidad tocante miho maneho, mas eficiencia operacional y implementacion di tecnologia moderno pa trata awa sushi di forma sigur y sostenibel.
Sin embargo, presentacion reciente tocante estado operacional di e plantanan a mustra cu, aunke tin progreso visibel, ainda tin deficiencianan cu mester atende cu urgencia y disciplina.
Entre e plantanan principal, nivel di operacion ta varia considerablemente. Parkietenbos ta operando rond di 90% di su capacidad, mientras plantanan na Bubali y Zeewijk ta rond di 65%, y e insinerado — un elemento clave pa maneho di desperdicio — apenas ta opera rond di 25% di su capacidad.
Segun Thomasia, e cifranan aki ta indica claramente cu sistema ainda no a yega na e nivel di capacidad y resiliencia cu pais mester pa sostene crecemento economico y proteha comunidad.
Durante e presentacion, parlamentario Thomasia a formula varios pregunta esencial tocante maneho, supervision y responsabilidad institucional.
Entre e preocupacionnan principal menciona ta:
- Unda e mecanismonan di control interno necesario ta pa garantisa un maneho responsabel di sistema?
- Ken ta responsabel pa supervision continuo di operacion?
- Y ken ta duna cuenta ora fayo operativo of ambiental ta surgi?
Ademas di maneho, Thomasia a pone enfasis riba importancia di siguridad ambiental y impacto directo riba comunidad. Segun su persona, mientras San Nicolas ta sigui crece — cu revitalisacion economico y aumento di turismo — presion riba sistema manera e planta di Zeewijk inevitablemente lo aumenta. Awe mes, e planta aki ta opera rond di 65% di su capacidad y ta hunga un rol fundamental pa maneho di awa sushi den region. “Aki ta unda mi preocupacion bira realidat,” Thomasia a indica.
Su persona a subraya cu tin pregunta fundamental cu mester haya contesta cla pa proteha comunidad y medio ambiente:
- Kico ta e kalidad di e awa cu ta wordo descarga den lama?
- Tin monitor continuo, independiente y transparente di e descarga aki?
- Ta cumpli cu e normanan ambiental internacional consistentemente?
- Y mas importante, e situacion ta completamente sigur pa famianan cu ta uza e lama y e awa den e area?
Thomasia a enfatisa cu esakinan no ta pregunta teorico, sino preocupacion practico basa riba observacion directo di uzo di e lama pa comunidad y bishitante. “Ami personalmente a mira famia disfrutando di e beach den e area. Esaki ta exactamente loke nos kier pa San Nicolas — pero e ta pone riba nos un responsabilidad adicional pa garantisa siguridad total,” su persona a declara.
E presentacion tocante AWSS tambe a mustra cu solucionnan ya ta identifica, incluyendo upgrade di infrastructura, optimalisacion di proceso operacional y inversion den tecnologia moderno. Segun Thomasia, e direccion strategico pa mehora sistema ta cla. Sin embargo, su persona a adverti cu direccion sin implementacion efectivo no ta suficiente pa proteha comunidad ni sostene crecemento economico.
Revitalisacion di San Nicolas no por avansa di forma sostenibel si infrastructura esencial no ta completamente prepara pa sostene e desaroyo. Desaroyo economico mester bay hunto cu sistema robusto, transparente y responsabel cu por garantisa siguridad ambiental y salubridad publico.
Thomasia a recorda cu San Nicolas anteriormente a pasa door di situacion unda infrastructura industrial no a wordo maneha cu suficiente responsabilidad na largo plazo, creando impacto negativo pa comunidad y medio ambiente. Segun su persona, e experiencia historico aki mester sirbi como les pa evita ripiticion di mesun eror. “E momento aki ta pidi accion cla y determinacion,” Thomasia a conclui.
Su persona a identifica tres prioridad fundamental pa sigura progreso responsabel:
- Fortalece maneho y supervision institucional
- Inverti consistentemente den infrastructura critico
- Proteha medio ambiente y salubridad publico den tur decision di desaroyo
“Pasobra na final, esaki no ta trata solamente di sistema di awa sushi,” Thomasia a declara. “Esaki ta trata di confianza entre gobierno, comunidad y futuro di San Nicolas y Aruba completo,” Segun parlamentario Thomasia, e preguntanan ya ta formula y e direccion pa mehora sistema ta cla. Awor e reto principal ta implementacion disciplina pa garantisa cu progreso ta realmente bay hunto cu responsabilidad y resultado concreto pa pueblo.
