Materialismo ta domina, y ciencia a aumenta ,cu e consecuencia cu hopi hende ta cay bao di engaño y no ta kere den e palabra di Dios.
Hende kier cambia principio y naturalesa di Dios, tin hopi cu kier haci bofon, mas ainda tin hopi cu kier reta Dios.
Di berdad tempo ta trabahoso (2 Timoteo 3:1-5) hende kier biba den inmoralidad y haci pica como un cos normal.
Ay di esnan cu ta yama malo bon y bon malo, loke ta scuridad lus, y locual ta lus scuridad, loke ta marga dushi, y loke ta dushi marga.
Ay di esnan cu ta tende e palabra di Dios, y toch kier permanece den scuridad, cu murmuracion y kehamento,
No tin nada grandi na e mundo aki ,cu Dios no tin poder pa bashe abao, no tin ningun fuerte cu por contra e poder y grandesa di Dios.
Maldad ta aumenta y hopi hende ta apoya maldad,leynan mundialmente ta wordo cambia pa apoya maldad,cuanto pais actualmente no ta apoya tur clase di inmoralidad, y ta pone Dios su boluntad, palabra y principio un banda.
Ley ta wordo cambia pa complace cu gruponan, pa gobernantenan keda popular y mantene nan posicion sin nota cu nan ta lanta furia di Dios riba e pais.
Tene bon cuenta: Mateo capitulo 15:13 Hesus ta bisa: Tur mata cu mi Tata celestial no a planta lo wordo ranca cu reis y tur.
Cuanto cos nos ta mira ta sosode y nos sa cu e cos ey no ta di Dios, ni tampoco e ta den boluntad di Dios, esey ta nifica cu nos no por participa den dje ni tampoco duna apoyo na dje, corda cu maishi y yerba shimaron lo crece hunto.( Mateo 13:36-43).
Den Daniel capitulo 6, Daniel a demostra cu e no ta apoya idolatria, y maske nan a tire den cueba di leon , Daniel a mantene su integridad y keda riba su palabra y Dios a manda un angel sera boca di e leonnan.
Dios semper ta sali na defensa di esnan cu ta sirbi Dios y cu tin confiansa den Dios.
Mundialmente hende ta tribi di haci cos nan cu ta abominacion den bista di Dios y nan ta pensa cu cantidad di hende y placa ta sostene nan , pasobra nan sa masha bon cu serca Dios nan no tin apoyo, solamente aki na tera por tin manifestacion pa influencia hende, pero serca Dios ta tempo perdi.
Tur locual ta funda riba mentira, inmoralidad, engaño,scuridad y malicia ta abominacion den bista di Dios.
Pasobra tin cosnan cu Dios no por haci pasobra Dios ta santo (1 Pedro 1:14-16):
Dios no por gaña ( Numbernan 23:19/ Hebreonan 6:8).
Dios no ta cambia ( Malaquias 3:6).
Dios no ta kibra su promesa (Jeremias 24:31).
Dios su poder no por wordo para (Daniel 4:35).
Dios su palabra no ta faya ( Salmo 111:7+8)
Dios ta odia pica ( Isaias 59: 1+2)
Dios no ta rechasa un curason kibra ( Salmo 51:17).
Sin Fe ta imposibel agrada Dios ( Hebreonan 11:6).
Dios ta digno di tur alabansa ( Revelacion; 4:8)
Dios no por stop di stimabo ( Jeremias 31:3).
Si un cos ta for di boluntad di Dios, y especialmente, yena cu orguyo, rabia, falta di pordon, ni maske cuanto purba dorne cu chuculati, Dios no ta den e asunto, y pronto tur cos ta cay den otro, pasobra Dios ta traha solamente atraves humildad y limpiesa di curason.
Sinceramente Pastor Marcel Balootje.
