Bo no tabata sa cu nos Pueblo di Aruba ta 90% Cristian, cu ta lanta nan yiunan manera mester ta. Homber y muhernan Cristian ta casa pa haya yiunan, manera nos mayornan den pasado a lanta nos. Bo no tabata sa cu hendenan Cristian ta stima Dios Su Palabranan den Bijbel pa haya sabiduria y bida eterno. Anto pakiko bo ta kere, cu Dios Tata a destrui e dos ciudadnan grandi di Sodoma y Gomorra y cu tur su habitantenan? Lesa den Bijbel Genesis 19: 1-23, pasobra e dos ciudadnan grandi di Sodoma y Gomorra tabata habita pa homosexualnan, lesbiananan y bisexualnan. Tur e hombernan di Sodoma incluyendo hobennan y ancianonan a rondona e cas di Lot y nan a bisa Lot: “Na unda e hombernan ta cu a jega bo cas anochi? Saka nan afo, pa nos tene relacion sexual cu nan. Y Lot a bisanan: “Mi ta roga boso, no comete tal maldad aki.” Dios Tata a laga yobe azufre y candela riba e dos ciudadnan grandi cu tur su habitantenan. Tambe den Bijbel Dios ta bisa, Levitico 18: 22 : “Lo bo no tin relacion sexual cu un homber manera cu sa haci cu un muher, esey ta algo abominabel.” Den Bijbel Levitico 20: 13 : “E homber cu drumi cu un homber manera ta drumi cu un muher, nan dos ta comete actonan repugnante, nan dos lo muri y nan sanger lo cay ariba nan.” Den e di 9 Mandamento di Dios ta bisa: “Lo bo no comete e pika di fornicacion y lo bo no comete e pika di deshonesto.” Bo no tabata sa, cu tur e pikanan di inmoralidad y e pikanan di deshonesto bo no por drenta den e Reino di Dios despues di morto? Lesa den Bijbel 1 Corinthionan 6: 9 y 10, Senjor Hesus ta bisa bon cla: “Boso no sabi, cu e inhustonan lo no drenta den e Reino di Dios? No ganja boso mes, pasobra ni e fornicadornan, ni e sirbidornan di diosnan falso, ni esnan den adulterio, ni e homosexualnan, ni e hobennan afemina, ni e pedofielnan, ni e violadornan di hobennan, ni e kibradornan di matrimonio, ni esnan cu ta bishita e muhernan di bida, ni e alcoholiconan, ni e blasfemadornan, ni esnan golos pa plaka, nan tur lo no drenta den e Reino di Dios.” Pa motibo di e tentacion di e mal pasionnan deshonesto di satanas, hombernan a kita nan tradicion natural pa bira homosexual y muhernan a cambia nan tradicion natural pa bira lesbiana etc. Comprende bon,cu hende no ta nace ladron, e no ta nace criminal, e no ta nace drogadicto, e no ta nace homosexual, e no ta nace lesbiana etc. Pesey mi kier a bisa, akinan no ta trata di descriminacion, akinan no ta trata di derechonan humano, akinan no ta trata di union civil, akinan no ta trata di igualdad etc. Pero akinan ta trata cu e Palabranan di Dios mester wordo respeta y Dios Su Mandamentonan mester wordo cumpli y obedece. Awor, si e hendenan di mundo mes ta celebra e maldad y e gobiernonan di mundo ta reconoce matrimonio di mesun sexo, anto ta con bo tambe por sigi tras di esnan ciego di mundo, pa bo tambe cay den e abismo di perdicion? Anto ta ki ehempel esey ta pa e Pueblo di Aruba y ta ki ehempel esey ta den bista di Dios Tata? Comprende bon, cu e Pueblo di Aruba ta 90% Cristian cu ta stima Dios y ta obedece Dios Su Palabranan y e Pueblo no ta sigi tras di esnan desvia pa satanas. Bai na un pastoor, pa bo haya conseho spiritual.

Un mensahero di Dios.

LEAVE A REPLY

Please enter your comment!
Please enter your name here