Hof a dicta sentencia; Paul Croes condena na 3 aña di prison y 8 aña no por postula como politico y tampoco por traha den Gobierno

ORANJESTAD – Awe merdia via video conference Hof di Corte Superior na Curacao a dicta sentencia den e caso apelacion IBIS. Luna pasa tratamento di e caso a tuma lugar y a keda palabra cu awe tin sentencia. Aruba Native por a compronde cu Wever ta e unico cu no a presenta.

Hof a rechaza e defensa hiba cu a viola e ley di derechonan humano (EVRM).

PAUL CROES

Paul Croes: Hof a mustra cu como minister, Paul Croes a malusa su funcion pa dispensacion di permisonan. E tabata pasa riba nengamento di permiso di e departamento concerni y tabata duna permiso tog. E funcacion Excelence a haya hopi placa di comerciantenan pa asina regla permiso. Hof tambe a mustra cu Paul Croes a laga drenta Aruba un muher ilegal pa cuida su yiunan. Hof ta haya Paul Croes culpable di e acusacionnan. Pa cu e castigo, Hof a tene cuenta cu door di e caso aki, a afecta Paul Croes hopi y cu e no tin bida politico mas. Sinembargo Hof no ta mira esaki motibo pa baha castigo. Hof a condena Paul Croes na 3 aña di prison y 8 aña sin por ta politico y funcion den gobierno. Hof a rechaza exigencia di PG pa detencion di Paul Croes di biaha.

MELONY CROES PAESCH

Croes Paesch, Hof ta haya cu un parti di labamento di placa so a wordo trata. Esaki ta relaciona cu e negoshi di Croes Paesch. Hof no ta haya proba cu a laba placa. Hof ta haya cu Croes Paesch ta culpable di a laga drenta un muher ilegal pa cuida nan yiunan. Hof a bisa di ta tene cuenta cu e caso aki a afecta e pareha Croes nan bida hopi. Hof a declara Croes Paesch liber di laba placa y a condena Croes Paesch pa a laga e muher ilegal drenta na 120 ora di trabao pa comunidad y si no cumpli cu esaki e lo mester bay 60 dia sera.

NUÑEZ

Hof ta haya cu Nuñez como tramitador a cumpra Paul Croes pa dispensacion di permisonan. Hof a duna Nuñez na 4 luna di prison condicional cu 3 aña di prueba. Tambe Hof a condena Nuñez na 150 ora di trabou pa comunidad y si e no cumpli cu esaki e lo mester bay 75 dia sera.

DI VECCHIA

Hof ta haya cu Di Vecchia a duna Paul Croes prijs special pa por haya permiso. Hof ta haya e exigencia di PG exagera. Hof a condena Di Vecchia na 2 siman condicional y 3 aña di prueba.

WEVER

Hof ta haya cu no a keda proba cu Wever a cumpra Paul Croes pa haya permiso. E hecho cu Wever a haci donacion chikito na Excelence pa campaña no ta relaciona cu dunamento di permiso. Hof a declara Wever liber.

MARTINUS

Hof ta haya cu Martinus ta wordo declara liber mescos cu PG a pidi. Hof a mustra cu Martinus a cumpra carchinan pa concierto manera e sa haci mas biaha. Hof no ta haya cu esaki tabata pa move Paul pa haya permiso. Hof ta confirma sentencia cu ta declara Martinus liber.

LEAVE A REPLY

Please enter your comment!
Please enter your name here